2017年1月25日 星期三

抵食日本二人套餐

之前office一直響尖東,都無留意到希爾頓大廈原來有間幾唔錯既日本餐廳,名叫「花月居酒屋」,直至朋友呢晚推介,先第一次黎品嘗。



餐廳幾闊落,平日夜晚黎到,唔駛排隊,食得輕鬆。呢度設有壽司枱,我地見特上刺身套餐 (二人前,$680) 都幾多野食,就叫呢個唔駛傷腦筋。



雜錦刺身拼盤

共有五款:三文魚、油甘魚、劍龍魚、八爪魚、北寄貝。魚生新鮮肥美,有油香,八爪魚煙韌無渣,北寄貝鮮甜唔腥,水準唔錯!



和風沙律

蟹柳蟹籽沙律,夾雜左蔬菜同蘿蔔絲等,加上醋汁,新鮮爽脆,夠開胃。



牛肉雜菜鍋

One of my favourites! 食牛肉鍋,湯底好重要,呢個味道調校得唔錯,牛肉肥瘦適中,有肉味,加埋生雞蛋、金菇、雜菜等,我又忍唔住叫個白飯黎撈啦 (不過之後就後悔,因為後面仲有好大碗烏冬,食唔晒)!



清酒煮大蜆

湯底味道香濃,酒味同蜆味都相當突出,可惜係大蜆煮得稍嫌過熟,縮左水,有少少韌。



稻庭湯烏冬

每人一大碗,包你食得飽!烏冬香滑,日式昆布湯底,清清地,唔錯。



雜錦串燒拼盤

雞翼、牛肋肉、冬菇。最好味係牛肋肉,醃得非常入味兼有淡淡酒香,火候控制得好,牛肉唔韌好味道;雞翼皮燒得香,卜卜脆;冬菇比較淡口,可以食到本身既味道 (但我鍾意濃味,都係覺得加少少醬油燒更佳)。



日式甜品

兩粒冰凍芋頭糯米糍,simple但我喜歡!


2017年1月24日 星期二

任食刺身先係重點!

一大班frd子,天寒地凍就梗係去打邊爐最開心熱鬧,呢晚我地黎到皇室堡既「海南四季」,呢度周一至四打邊爐每位$198,加$50可以任食刺身,兩小時既放題,抵食又就腳。






酒樓地方夠大,座位闊落,環境光猛,樓下盡是維園景,相比其他中式酒家,坐得更更更舒服。




自助配料Corner,基本調味都齊備;飲品任拎,除左一般既罐裝汽水,仲可以選擇樽裝酸梅湯,以及自家製竹蔗茅根,夠清潤。



打邊爐好熱氣,所以我地今晚乖乖叫左芫茜皮蛋湯底,好清,芫茜味夠香,皮蛋煲到淋晒亦好味。



任食火鍋會贈送海鮮拼盤,有海中蝦、帶子、珊瑚蚌、桂花蚌,貝類都新鮮爽口,但我更喜歡中蝦,鮮甜。



加$50 (每人) 可以刺身任食,我覺得絕對值得!刺身選擇有三文魚、希靈魚、甜蝦、吞拿魚、玉子、油甘魚、北寄貝、八爪魚、鮑魚片、魷魚,全部都好新鮮,尤其係甜蝦,十分鮮甜,叫多幾轉已可翻本!





呢度既餃子選擇多,有D仲係幾新奇,例如蟹籽燒賣餃、南翔小籠餃等等,前者狀以雲吞,但咬落去係燒賣豬肉,仲有粒粒蟹子卜卜脆,好得意;後者基本上同小籠包味道一樣,佢既皮同肉都係小籠包咁,只不過今次唔係蒸,而係放湯打邊爐!

其他餃子仲有韭菜餃、魚皮餃、珍菌野菜餃、小燕餃等等,「餃王」必食!另外,記得唔好錯過椰菜野雞卷,係用新鮮椰菜包住雞肉,造型靚,味道也好。



打邊爐又點可以唔食肥牛?呢度選取既係美國肥牛,肥瘦適中,薄薄既一塊好易淥熟,美味!





我地並非愛魚之人,但魚皮同魚麵仍是「飛佛」。魚皮脆卜卜,同響鈴都係邊爐好拍檔;魚麵味道比較清淡同腍身,不過仍然有魚味。



食肉獸都需要食菜既,朋友揀左皇帝菜,新鮮而且有獨特既香氣,雖然已經飽到反艇,但仍然食左好幾轉!




必食滑溜銀鱈魚

銅鑼灣最近開左間新餐廳叫「Neighbor」,一於同媽咪去撐下枱腳。




餐廳雖說係地舖,但主要既座位都置於二樓,綠化既環境,幽暗既燈光,座位闊落好坐。我地今晚點左兩個set dinner,價錢由百幾到二百幾,粉、麵、薄餅、扒類都有,選擇繁多。



頭盤沙律

沙律係Caesar Salad,蔬菜爽甜新鮮,麵包夠脆,芝士汁酸咪咪,而且夠晒大碗!



鵝肝多士 ($68)

另外叫左個鵝肝多士,鵝肝豐盈,牛油多士甘香,本來兩樣分開黎食,分別都好好,但如果一齊食呢,就稍嫌少少油膩。



雜菜湯

每人大大碗,雜菜唔算好多,不過調味頗佳,酸甜帶辣,而且無落忌廉,夠清,唔會肥,我鍾意!




銀鱈魚配檸檬牛油忌廉汁 (晚餐,$238)

主菜黎啦。呢個銀鱈魚值得推介,魚皮煎香,魚肉滑溜,用刀切開,魚肉一片片,夠實淨;底下既薯條夠粗,火候恰到好處,唔好錯過!



千島海鮮薄餅 (晚餐,$178)

餐廳做既係羅馬薄餅,全部都係薄批,夠脆夠香口;我地呢個係千島海鮮,酸甜有菠蘿粒,大愛!




乳酪雪糕

甜品係乳酪雪糕,竟然帶有煙靭既口感,甜甜既味道,好特別呀!






食得毫無壓力既日式放題

唔知你有無同感?香港既日式放題愈開愈多,但好多都有限時,食到趕頭趕命,想同朋友開心傾多兩句都唔得。

如果你都認同,可以考慮去位於金鐘商業區既「四季‧悅」,呢度既晚市放題由六點食到十點,每位$398,食得開懷又無壓力。





我周六晚黎到,本來以為會大把位 (因為係商業區嘛),但點知座無虛設,人山人海咁,一睇就知係抵食之選。為左應付咁多客人,餐廳請左好多壽司/ 刺身師傅,大家即管點即管剔,唔駛等好耐就有得食!



梅酒

除左橙汁/ 桃茶任飲,餐廳仲送上每人一杯梅酒,甜甜既酒味,加上冰粒,爽!






刺身 + 壽司

先黎回本既刺身同壽司!海膽壽司係必點,軟滑鮮甜,食完一輪再一輪,完全唔駛閘住,真開心!刺身方面,我最愛石恒貝,十級爽口,咬到卜卜聲,又係食完再encore!







鐵板燒 + 串燒

最喜歡係牛舌,加左少少黑椒調味,夠厚夠腍,有油香;其次愛日本大蔥,好大粒,夠鮮甜,燒到熱辣辣,美味!




炸物

平時少食炸物,今晚都忍唔住要破戒!軟殼蟹香口、多肉;天婦羅當然要有番薯同南瓜,甜甜地好好食;蟹柳肉係一絲絲的貴價貨,唔會食到成口粉,唔錯。




燒物

銀鱈魚必食!肉質嫰滑有油香,筷子一夾開,一片片既魚肉,夠實淨;菠蘿甜美,用黎做飯後果啱晒!



前菜

到最後先食番前菜,唔好笑我,因為個胃無乜位,食呢D仲可以!推介牛蒡漬物,有益健康,而且醃得入味。




甜品

最後可以每人點一個甜品同雪條,呢晚既甜品係啫喱,好有童年回憶!雪條來自明治,朱古力脆皮雲呢拿,香滑!