拜會西太后，必飲熱朱古力！

Vivienne Westwood Cafe已經開左一段時間，一直怕多人未敢拜會，直至最近響FB見到朋友去嘆茶，心郁郁終於去走左一趟！

星期日下晝五點零黎到，唔駛排隊，真幸運！餐廳座位唔多，裝修好有法國古典風情，大愛！

Triple Hazelnut Cake ($55)

最鍾意食榛子甜品，仲要三重咁緊要？梗係要點！果然好啱口味，首先大大塊VW朱古力呃like好方便，二黎個蛋糕真係好美味，內裡的mousse非常軟滑，榛子味出眾，餅底仲有薄脆，咬落sok sok聲，好好味。唯一美中不足係價錢稍貴，$55只有好細件，不過係VW，單係品牌名都要收貴你$20，好正常！

Scones ($68)

可以選擇淨味同提子味，我地每樣要兩件。鬆餅上枱時仲熱辣辣，外層脆卜卜，牛油味香濃，水準唔錯，但cream同jam就相對普通而且分量少，拉低左成碟既分數。

Hot Gourmet Chocolate ($60)

我鍾意飲熱朱古力，但同時又唔太受得奶，如果杯朱古力太creamy，飲完個胃隨時會投訴幾日。VW既熱朱古力就啱啱好，朱古力味相當香濃既同時，又唔會太creamy，飲完都好舒服，而且感覺無咁肥，下次黎都會再點！

令人回味無窮的「烤肉醬牛胸脊」(有片)

天氣開始涼，除左打邊爐，食日式烤肉都係好好既選擇。經朋友介紹，呢晚黎到上環既「葫同日式燒肉」食餐好。

餐廳唔大，但有足夠既空間感，室內燈光相當柔和，俾我好舒服既感覺。我地兩個人，點左一個$400既晚市套餐，全程有人燒埋，蹺埋雙手就食得。據老闆介紹，佢地幫客人燒埋，唔單止係要方便顧客，而且係想多D同客人傾計，增進溝通。

和風沙律

蔬菜新鮮翠綠，加上醋汁，酸咪咪夠開胃。

鹽蔥牛舌

牛舌係薄薄既一塊，上面鋪滿香蔥，店員只燒一面就足以令兩面都熟晒。蔥花好香，一啖放入口，大滿足！喜歡既話，可以點餐廳既特製醬汁，一邊係藥材豉油，另一邊係新鮮青檸汁，兩種味道都唔錯。

烤肉醬牛胸脊

頂級安格斯牛肉，油花分布平均，燒完成塊放入口，軟嫰有肉汁，非常美味，相信大家食完一轉都會好似我咁：追加一份！

椒鹽霜降松板豬

霜降松板豬，同樣有雪花，可惜店員燒得略乾，食落無我想像中咁肥美多汁，有少少失望。不過豬肉質素依然係唔錯既，有肉味，亦燒得香。

牛油去骨雞腿肉 + 一口雞翼

燒既時候，店員會將雞腿肉加上蒜蓉牛油，所以食呢個唔需要特別醮任何醬汁，都已經夠晒美味；雞翼已開半，食起黎好方便。無論雞腿肉定雞翼，都燒得雞皮微焦，非常脆口，雞肉嫰滑，唔錯。

翠肉瓜 + 椒鹽杏鮑菇

食左咁多肉，係時候食番D蔬菜。翠肉瓜沾上左味噌，增添左日本風味，兩種蔬菜燒完後仍保持水份，好食。

極級蟹膏帶子刺身 ($89)

食完套餐，唔係好夠喉，於是叫多一份餐廳既招牌菜蟹膏帶子。帶子相當厚肉，新鮮味美，更可貴係面頭既松葉蟹膏，聽老闆講，香港好少餐廳入到貨，所以真係要嗒真D！蟹膏味道甘香濃郁，細味有after taste，真係幾好，難怪可以成為signature dish！

花心思製作的掌壽司

之前已經到過掌壽司，無論環境、食物、服務，都感覺非常良好，今晚一於再次走入駱駝漆大廈會一會佢。

餐廳地方好闊落，燈光柔和，而且啱啱換上左聖誕布置，好有氣氛！

前菜：汁煮牛舌

甜甜既番茄味，加埋充滿天然甜味既紅蘿蔔同洋蔥，令人胃口大開。

吞拿魚青瓜沙律 ($68)

呢道菜看似簡單，但其實都用上幾多材料，首先面層係木魚絲，中間既吞拿魚沙律包括黑芝麻、雞蛋、青紅椒、番茄等等，底層係新鮮青瓜，最後伴碟仲加個羅勒葉汁，食起上黎爽脆清新，Yummy！

刺身和卷套餐 ($298)

成幅立體畫咁靚，上面有齊壽司同刺身，包括中拖羅、油甘魚、鮑魚、吉列蝦海膽卷。我最鍾意係個壽司卷，面層有拖羅蓉、淋上海膽同黑椒既拖羅塊，壽司飯中間係牡丹蝦刺身，有刺身既鮮甜，又有黑椒既辣味衝激味蕾，非常好。

另一推薦係鮑魚刺身，鮑魚本身好爽脆，面頭加上西京麵豉汁，據老闆介紹，麵豉內仲加入左奶、蛋黃、酒，醬汁味道帶甜，能吊起鮑魚既鮮味。

壽喜鍋 ($398)

材料豐富，分量頗多。牛肉好得，係澳洲和牛，肥瘦同厚度都適中，牛肉味香濃；套餐附有兩隻溫泉蛋，你喜歡加豉油點牛肉食又得，齋啪又得，我就選擇叫多碗白飯，加蛋加湯去食，美味到不得了！

日本綠茶雪糕，北海道3.6牛乳雪糕 (各$25)

日本進口雪糕，唔駛講味道香滑，奶味濃郁，食完火鍋食雪糕過一過冷河，最適合不過！

提多一句，只要半小時前打電話黎訂座，可以享受全單九折優惠，精明眼們要記住啦。

觀塘靚裝串燒店

觀塘工廈餐廳既選擇愈黎愈多，最近又進駐左一間串燒店，名為「鮮‧港式串燒吧」，天寒地凍，一於去試下。

餐廳門口係一幅大磚牆，突然令工廈呢個角落高貴起黎！入到餐廳，空間好大，座位闊落。餐廳採用開放式廚房，但食完個身都完全無油煙味，值得一讚。

餐廳食物分為串燒、蔬菜、海產、炸物、小食及甜品。一坐低，侍應先送上調味品，三格入面分別係泰式魚露、粗鹽、醬油。不過我覺得大部分串燒都好夠味，呢三格調味料基本上用唔著。

冬菇 ($15)

好多時食燒冬菇都會覺得太淡，但呢度就無問題，調味好足，仲能夠帶出冬菇既鮮味，有少少驚喜。

厚切牛脷 ($38)

唔算太厚切，不過味道都唔錯。用左鹽同黑椒去調味，爽中帶腍。

粒粒墨魚丸 ($15)

經過燒烤既墨魚丸，有一股特別既香氣，味道未算好有驚喜，但喜歡墨丸既人都一定會點。

墨汁墨魚腸 ($15)

唔知係咪受到外形既影響，呢碌好似膶腸既墨魚腸，真係好似有少少膶腸味咁！味道唔錯，有粒粒墨魚，彈牙美味，比墨丸更出色。

明太子飯糰 ($32)

飯焦控必點燒飯糰，外層燒到卜卜脆，入面咬到「撲撲」聲，夾埋沙律醬食，幾好。

磨菇雞肉飯糰 ($28)

磨菇同雞肉用燒汁炮製過，有淡淡既甜味，個人更喜歡呢個飯糰。

鹽燒雞中翼 ($22)

雞翼只用鹽去調味，皮脆肉嫰，簡單而美味。

菠蘿 ($18)

菠蘿夠新鮮，大廚用左少少椒鹽去調味，令菠蘿帶有微鹹同辣味，熱辣辣，作為飯後果消滯也不錯。