上環好味樓上餐廳

去開上環做野，響地鐵站口抬頭一望，見到一間叫Green Orange既樓上餐廳，咁方便，不如醫左肚先！

餐廳都幾有情調，坐坐下，人客愈來愈多，全餐廳滿座，根據「人數指標」，呢間應該係好野黎！

先黎餐包，一個芝蔴、一個蜜糖味，香脆帶微甜，熱辣辣，唔駛點黑醋同橄欖油都已經夠好味。

燒帶子柚子沙律 ($108)

帶子面頭煎香，裡面仍然保持鮮嫰；柚子無酸味或苦澀味，反而係清甜，加埋其他蔬果食，好清新。

海鮮濃湯 ($98)

濃湯材料好豐富，有鮮蝦、帶子、青口等等，最驚喜係入面竟然仲有大量已拆新鮮蟹肉，非常美味！

醬燒美國豬仔骨 ($228)

採用美國豬肋排，比平時食開既豬仔骨更厚肉，令人食得相當滿足！BBQ醬調製得好，酸同辣味恰到好處，讚！

香煎虎蝦帶子墨魚汁意大利飯 ($218)

意大利飯軟硬適中，有濃香芝士味，滋味無窮，大蝦同帶子亦新鮮，係我食過少數覺得滿意既Risotto。(但靚女們小心食到成個嘴唇同牙齒都發黑，有失儀態！)

檸檬芝士蛋糕 ($78)

蛋糕入面有檸檬芝士醬，香甜清新，令蛋糕唔覺飽滯。