餐廳設有開放式串燒bar，全部串燒新鮮燒成，單憑呢陣香氣，已經叫我決定陣間要叫番幾串。
蟹肉芝麻凍菠菜 ($48)
較少食菠菜沙律，所以叫左一客「蟹肉芝麻凍菠菜」試試。麻醬分量頗多，味道偏酸，令人精神為之一振！蔬菜新鮮碧綠，係清新既開胃菜。
馬糞海膽 ($148)
成板海膽咁上，實在令人興奮！海膽鮮甜、味濃，每塊紫菜夾一行海膽食，奢華得令人快樂！
原條燒茄子 ($78)
茄子之上係蒜蓉同沙律醬，味道帶點辛辣，同味淡既茄子配合得好好，無乜肥膩感，好食！
雞頸肉 ($28/串)
聽侍應介紹，雞頸肉係由餐廳師傅每日用雞頸起肉做，出面餐廳好少食得到。雞頸肉較一般雞肉煙靭爽口，而且不含肥肉，幾特別。
厚切牛舌 ($58/串)
牛舌又厚又腍，只用黑椒同鹽去調味，證明只要食材好，簡單既烹調已經味道出眾。
黑牛頂業片 ($68/串)
美國牛肩脊位，中間有筋位，爽而不靭，面頭加上芥末子，帶點酸同辣，有畫龍點睛之效。
明太子雞翼 ($58/串)
一端上枱，已經聞到雞皮既陣陣香味；明太子分量好足，味道微辣，好食。
雞丸 ($58/串)
雞丸即免治雞肉串，啖啖肉，加埋一隻生雞蛋俾你醮，增添左蛋香。
白鱔 ($48/串)
最後係白鱔，肉質爽口彈牙，師傅將魚皮完全燒脆燒香，必食之選！
沒有留言:
張貼留言
注意：只有此網誌的成員可以留言。