九龍城惹味小菜

九龍城最多係咩？泰國菜館、甜品店？其實選擇又點止咁少？啱啱同大班朋友試過呢間「雷公子海鮮串燒大排檔」，發覺水準唔錯，下次黎九龍城可以多個中菜選擇。

一坐低，侍應先送上每人一碗湯，呢晚係霸王花煲瘦肉，估唔到咁鮮甜清潤，我呢期熱氣，飲呢個最好！

跟住其實我想講下佢D碗！叫左支啤酒，餐廳竟然俾左兩隻碗我地，仲要寫住「戰鬥碗」、「勝」，好豪氣！咁我地一於飲「勝」啦！

海鹽手插蝦  ($198)

一打開錫紙，香噴噴既避風塘香味即刻搶住出閘。蝦好新鮮，蝦頭有膏，蝦身鮮甜，而且避風塘料好香口惹味，呢個係我既必食推介！

漢王蒙古重慶烤魚 ($298)

好辣，而且係愈食愈辣！我食唔到好多，但D朋友就食得津津有味，後來仲加入左紅薯粉打邊爐！魚肉好滑，骨唔多，確係幾好味既。

冰鎮古惑鮮魷 ($108)

點古惑？鮮魷已經灼熟，然後放響冰塊上面冰鎮，食起上黎相當爽口，餐廳仲配埋日式芥辣豉油，所以感覺就好似食緊刺身咁，老闆今次真係古惑啦！

古法客家碌鴨 (半隻，$138)

呢個調味帶甜，聽大廚講，原來係加入左羅漢果，唔單止特別，而且仲同鴨肉好夾！鴨肉入味，一齊煮既蓮藕亦非常甜美爽口，不得了！

小尖笋農家小炒肉 ($98)

干鍋肥腸 ($98)

跟住係兩個辛辣菜式，小炒肉肥瘦適中，炒得惹味；肥腸炒得乾身，由肥腸變成瘦腸，兩款都最啱送酒。

蒙式燒烤脆豬手 ($198)

乳豬皮香脆，乳豬肉上層稍為乾身，食既時候記得點大廚秘製既「蒙古烤汁」，好香薄荷葉味，帶有淡淡甜味，中和番豬手既鹹，唔錯。

秘製燒豬肋骨 ($198)

由廿幾種香料將排骨醃足六小時，唔駛講都知入味；排骨面層烤得微焦，有蜜糖香，送飯一流！

上湯豆苗 ($128)

食左咁多肉，都要食番碟菜，而家豆苗當造，食得正係時候，新鮮嫰綠，蒜子亦帶有天然鮮甜，唔駛一陣間，已經俾大家清左碟！

令人無法抗拒的西班牙Tapas

已經唔係第一次去Sabor Spanish Touch Private Kitchen，覺得呢度既Tapas好好食，尤其係墨魚粒同蒜蓉蝦，實在念念不忘，相隔幾個月，終於有機會再黎會一會！

正式開餐之前，餐廳送上免費既餐前小食 -- 蒜蓉番茄多士，味道酸得黎帶D生蒜既辛辣，好能夠刺激味蕾！

Clams in Green Sauce

蜆肉新鮮又大隻，廚師火候控制得好，唔會過韌；汁底用魚湯熬製，濃香鮮味。

Grilled Cuttlefish with Green Allioh Foam

再次encore既墨魚粒粒，依然無叫我失望！墨魚勁厚肉，彈牙又有鹹香；不得不提個醬，廚師用番茜、生蒜、雞蛋、牛奶等材料，用氣槍打成泡沫，食入口就好似鹹既mousse咁，非常軟滑，好~好~食！

Stuffed Squid in Black Ink Sauce

吊桶入面釀有乾菌、豬肉、魷魚等，咬落去好軟腍，啖啖肉；吊桶外面係白汁，有奶香。

Portobello Benedict

採用Egg Benedict製法，面頭係荷蘭汁，中間係溫泉蛋，下面係炒過既洋葱，不過底部既唔係麵包，而係一隻大磨菇。用刀一切，蛋黃即如泉湧，蛋味香濃，非常juicy！夾埋洋葱、磨菇、紅莓醋、火箭菜等等黎食，無得彈！

Crab Crayette with Allioli 

炸蟹肉球，一切開，入面全部係蟹肉，貨真價實！面頭炸得香脆，配埋個加左辣粉既蒜蓉沙律汁，香口又美味！

Garlic Shrimp

一上枱已經香氣逼人！大蝦好新鮮，鮮甜彈牙，用蒜片同橄欖油炒香，上枱時橄欖油仍熱到起泡，熱辣辣非常惹味！

Suckling Pig

乳豬皮烤得好脆，內裡肉質軟嫰，肥瘦適中，試問大家又點可以錯過呢一道西班牙美食！

Tiramisu Foam with Homemade Mix-berries Gelato

同一般Tiramisu唔同，呢個係打左氣入去既，非常creamy軟滑，餅底香脆，酒味唔太濃，啱我！雜莓雪糕酸咪咪，口感幼滑，仲食到唔少雜莓果籽，好fresh！

Warm Chocolate Coulant

最後就係呢個心太軟，侍應解釋，佢地加入左更多麵粉製造，所以質感同蛋糕更加相似；一切開，朱古力漿即時湧出，暖笠笠，甜度適中，大愛！

以上八款Tapas (連甜品)，再加一味乳豬，二人合共食左$1,240，物有所值！

高品質日式串燒

銅鑼灣澳門逸園中心有唔少日式餐廳，之前試過漁獲浜燒，呢晚再試同樣有唔少好評既鳥居居酒屋。

餐廳設有開放式串燒bar，全部串燒新鮮燒成，單憑呢陣香氣，已經叫我決定陣間要叫番幾串。

蟹肉芝麻凍菠菜 ($48)

較少食菠菜沙律，所以叫左一客「蟹肉芝麻凍菠菜」試試。麻醬分量頗多，味道偏酸，令人精神為之一振！蔬菜新鮮碧綠，係清新既開胃菜。

馬糞海膽 ($148)

成板海膽咁上，實在令人興奮！海膽鮮甜、味濃，每塊紫菜夾一行海膽食，奢華得令人快樂！

原條燒茄子 ($78)

茄子之上係蒜蓉同沙律醬，味道帶點辛辣，同味淡既茄子配合得好好，無乜肥膩感，好食！

雞頸肉 ($28/串)

聽侍應介紹，雞頸肉係由餐廳師傅每日用雞頸起肉做，出面餐廳好少食得到。雞頸肉較一般雞肉煙靭爽口，而且不含肥肉，幾特別。

厚切牛舌 ($58/串)

牛舌又厚又腍，只用黑椒同鹽去調味，證明只要食材好，簡單既烹調已經味道出眾。

黑牛頂業片 ($68/串)

美國牛肩脊位，中間有筋位，爽而不靭，面頭加上芥末子，帶點酸同辣，有畫龍點睛之效。

明太子雞翼 ($58/串)

一端上枱，已經聞到雞皮既陣陣香味；明太子分量好足，味道微辣，好食。

雞丸 ($58/串)

雞丸即免治雞肉串，啖啖肉，加埋一隻生雞蛋俾你醮，增添左蛋香。

白鱔 ($48/串)

最後係白鱔，肉質爽口彈牙，師傅將魚皮完全燒脆燒香，必食之選！

尖沙咀區樓上Fine Dining

想響尖沙咀區靜靜地食餐好，可以試下金馬倫道既Amina Modern European，呢度提供高級fine dining同生蠔等高級法國同意大利菜。

餐廳細細，只有五六張枱，近bar枱放滿唔同品種既生蠔，朋友食完三隻再三隻，話好耐無食過咁美味既生蠔！

必須講下個餐牌，一本有星，一本無星，究竟有乜唔同？原來有星果本係有標價錢，只給男士；無星果本就俾女士，即是女士食野唔駛睇價錢！呢條橋我勁buy，男士們要突顯風度，而家係時候啦！

我地今晚揀左十道菜既餐單，每位$1,180。

餐上小品

平時食巴拿馬火腿，梗係要夾塊新鮮蜜瓜/哈密瓜肉一齊食，今晚餐廳就搞搞新意思，將蜜瓜變成一杯充滿瓜蓉既汁，非常清新甜美，而且飲起黎好方便，啱晒要顧全儀態既女士。

自家製麵包及特式醬

有牛油麵包同提子合桃麵包，全部都烤到面頭脆卜卜，旁邊配以蜜糖甘筍醬，甜甜既味道，正式開始今晚既盛宴啦！

輕煎北海道帶子

帶子只係經過輕煎，面頭有焦香，裡面仍然係刺身，有雙重口感；墊底既係近年被奉為super food既藜麥，含有豐富蛋白質，而且不含脂肪，旁邊再加上椰菜花奶泡，甜甜地，健康之選。

美國穀飼牛肉他他

他他除生牛肉之外，仲加入左酸瓜、蒜頭、黑醋，味道帶點辛辣；唔好錯過伴碟既黑醋粒，係用分子料理製成，又靚又有實際功用。

法國野豬肩肉凍

豬肩肉凍調味剛好，中間粉紅色既係鵝肝，濃香味美。肉凍之下係紅菜頭沙律，又甜又新鮮，唔錯。

龍蝦忌廉濃湯

好多龍蝦湯都偏鹹，呢個剛相反，竟然帶有甜味；伴碟既係炒香左既龍蝦子，想湯既味道濃一D，可以將龍蝦子加入湯中，夠晒心思。

香煎法國鵝肝

鵝肝唔算厚，但煎得好香，面頭係粗鹽同黑椒，點埋旁邊酸酸甜甜既士多啤梨汁，簡單而味美；鵝肝底下係薑餅碎，一黎可以索油，二黎味道都確係唔差；旁邊既係紅酒天使麵，味道唔太突出。

檸檬木煙燻阿拉斯加蟹肉

上枱時用罩蓋著，開蓋後入面既煙先慢慢飇出黎。成個蟹肉有好香煙燻味道，伴以旁邊既柚子醬、海草珠食，夠開胃。

水果雪葩

食到而家，係時候清一清味蕾，迎接主菜啦。呢晚係番石榴雪葩，清香甜美。

澳洲M9和牛肉眼扒

牛扒好有水準！有肉味，面層焦香，內裡仍保持肉汁；配以黑松露燒汁，多添一份香氣。

法式春雞

春雞本身已經夠嫰，餐廳仲加以香蒜牛油去slow cook，非常嫰滑！春雞之下係雅枝竹蓉，雅枝竹又有蔬菜之王既美譽，因為佢營養豐富，而且含豐富蛋白質同鐵質，卡路里超低，我呢晚第一次食，味道有點酸和澀，係幾新鮮既體驗。旁邊既大蔥，靚到好似藝術品咁，清新鮮甜。

自家製海鹽焦糖蛋糕

蛋糕都做得出色，單睇橫切面就見到係由多重材料做成，非常花心思。我鍾意入面既脆片，好脆好輕盈；旁邊仲有件朱古力雪糕泡芙，冰冰涼涼，濃重朱古力味，一個字：好！

雪影

咖啡/ 茶

雪影其實係五粒朱古力，包括黑朱古力、Truffle、士多啤梨、Raspberry、榛子，怕甜膩？唔駛驚，因為最後仲可以選唔同既花茶去解膩，咁就完成圓滿既一餐啦！