新奇！餃子Pizza！(有片)

夜晚去銅鑼灣行完街，記起之前去過一間叫Babbo Trattoria既樓上餐廳，好味又就腳，今晚一於encore！

小麥條 (免費)

侍應先送黎一杯小麥條，如果要我「俾脆」，我覺得每條都十級脆！小麥條上面只有少量鹽調味，響等餸期間邊食邊吹水，一樂也。

Sangria (White, $198)

上次黎飲過紅酒Sangria，今次試白酒。同樣係甜甜既果味，白酒更清新甜美。

主廚綜合開胃菜 ($168)

心多多既朋友，叫呢個拼盤最啱，因為佢有齊唔同既開胃菜組合。今日我地呢個分別有：意式麵包、番茄乳酪、火腿拼盤、帕爾瑪火腿哈密瓜。我最鍾意係意式麵包，上面有溶左既芝士，勁正；另一「飛佛」係火腿哈密瓜，水果新鮮甜美。

波隆那肉醬披薩餃 ($228)

生活響香港，邊個未食過pizza？但包到成隻餃子咁款既，你又有無見過？只見侍應手起刀落，「咔嚓」一聲切開，裡面既蛋醬即刻流瀉而出。Pizza入面係芝士、茄醬、磨菇等等，帶微酸，「餃子皮」煙煙靭靭，好味道。

托斯卡尼窯烤豬肋骨 ($358)

豬肋骨肉質細嫰，一咬即骨肉分離！旁邊既伴菜都唔好錯過，洋蔥好甜，食完一圈又一圈。

Chocolate Tart ($58)

最後黎個甜品，朱古力撻味道香濃，但絕對唔會過甜，配埋旁邊既生果食，可以中和番朱古力既甜膩，相當唔錯！