2016年12月21日 星期三

到城市綠洲Take a Break!

冬至喎,公司有得放早,我地呢D躝街精梗係無咁快返屋企,反而係去左太子既「居廬 Take a Break」hea一hea,嘆杯啡食個甜品。



響太子界限街,突然出現一間古色古香既茶室,就係佢啦。響呢度,幾乎每位客人都會帶埋平板電腦黎,邊飲咖啡邊上網,非常悠然自得!



薑餅人朱古力 ($42)

就先黎杯熱飲啦!臨近聖誕,要呃like就梗係叫薑餅人飲品 (其實餐單原本係薑餅人Latte,但我唔太飲咖啡,所以轉左Hot Chocolate),面頭係一個好可愛既ginger bread公仔,相機食飽我再飲,好香朱古力味,但唔會太heavy,仲有胃食其他野!



番茄芝士薄餅 ($68)

食Pizza我鍾意食簡單既,呢個番茄芝士就啱晒我,原塊新鮮番茄+勁多芝士,面頭有少少黑椒調味,酸酸地帶微辣,餅邊香脆,開胃好食。



焗煙燻德國火腿牛角包配欖油雜菜沙律 ($68)

Pizza做得出色,我地即時encore個牛角包,果然同樣出眾!牛角包充滿牛油香,而且烤得鬆脆,一切即散;芝士同火腿永遠係絕配,鹹香惹味,夾埋酸酸甜甜既沙律醬,非常好。



紫薯草莓鬆餅 ($88)

花花造型,又係呃like之選!面頭係香芋雪糕,每一格窩夫都有半粒新鮮士多啤梨,我最怕食酸生果,呢D士多啤梨新鮮帶甜,啱食;鬆餅入面有紫薯蓉,淡淡既紫薯香甜味,邊皮烤得脆口,更添口感。



朱古力香蕉鬆餅 ($78)

鬆餅厚身,軟綿綿,放入口係滿滿既蛋香,當然唔好錯過濃濃既朱古力漿同新鮮香蕉,好夾,再飲多兩啖熱朱古力,咁就度過一個非常relaxing既下午啦!



2016年12月18日 星期日

上帝,請給我多一點時間!

尖沙咀金馬倫道有一間裝修得幾靚既日式餐廳叫「炉端金」,心諗響度食野一定唔平,點知上網睇一睇,周末午市放題只係每人$185,大胃王加埋燒烤就加多$38,絕對affordable,呢日一於黎試下。






入到餐廳,又大又闊落,裝修非常揼本,立時滿心歡喜!呢度既串燒全部都即點即燒 (由生燒到熟,唔會燒定),所以製作需時,大家要食好野就必須要耐心等候啦!

睇下柯打紙,總共有11張,分別係:刺身、壽司/創作壽司、火炙壽司、軍艦/手卷、卷物、沙律/小食、天婦羅、炸物、串燒、烏冬/拉麵/飯/其他、燒肉 (另加$38)。咁多野食,限時100分鐘要分秒必爭啦!









先食壽司同刺身啦!刺身全部騰雲駕霧咁上枱,好靚呀!刺身好新鮮,尤其喜歡甜蝦同鮑片,好鮮甜;海膽手卷亦係必食,新鮮甜美,夾埋脆卜卜既紫菜,非常好味。










串燒又係擺到成幅畫咁靚上枱,真係唔小心「嘩」左一聲出黎。串燒全部熱辣辣,必點牛舌,只用黑椒同鹽去調味,爽口惹味;燒蝦都好好,有天然鮮蝦甜味;安格斯牛粒串好有肉味,牛魔王必食! 



我對枝豆有一種情義結,今日都點左,只用少少鹽去調味,食到枝豆既天然味道,好。





今日破戒,食左一D炸物同燒烤,講真,加$38可以食埋日式烤肉,真係好抵,只係怕唔夠時間,如果你自問食得快先好挑戰烤肉!炸物好好食,外層脆卜卜,最正一定係「榴槤炸彈」,一咬開榴槤即刻爆出黎,超級美味!天婦羅有紫心番薯,好幸福呀!




呢度既甜品好高品質,雪糕係Movenpick同Haagen-Dazs呀!見到即刻癲左,可惜已經好飽,否則只係食雪糕都可以回本!






飲品都絕對唔hea,平時去日食放題,邊有Asahi架?而且呢度仲有韓飲、波子汽水等等,平時真係要食貴價自助餐先有,呢度百幾蚊就有咁既水準,絕對超值!





2016年12月17日 星期六

食得滿足的韓牛套餐

天氣轉涼,除左打邊爐之外,另一個好選擇一定係韓燒,呢晚想食韓牛,一於去炑八。


韓牛套餐 ($785)

呢個韓牛套餐分量頗多,足夠4人享用 (唔好忘記仲有可以無限添加既爐邊蛋、芝士、蔬菜等),每人除開約200蚊,價錢OK。



爐邊泡菜蛋


爐邊粟米芝士

爐邊兩種美食黎講,我較喜歡粟米芝士,甜甜地又滑溜;泡菜蛋都唔錯,雖然泡菜味唔太突出,不過有蛋香。




甕醃1++韓牛五花肉

咁多款韓牛,最鍾意係呢個五花肉,肥瘦適中,好有牛肉味,而且非常juicy,一邊食D肉汁一邊響口腔內爆發,正斗。




韓牛肩胛肉



LA牛骨



厚切五花腩



特製護心肉

其他烤肉都高質,尤其係護心肉,肉質腍,而且調味好,一啖一塊好美味;五花腩既肥肉夠爽口,包埋生菜同麵豉醬食更佳。




韓國大蝦

除左肉肉同肉之外,套餐亦有海鮮。呢個大蝦好抵讚,因為除頭尾之外,中間既蝦殼已經除去,直接燒香即可食用。蝦頭有膏,蝦身鮮甜,唔錯。




大八爪魚

用韓式辣醬醃過,帶微辣,口感彈牙爽口,好快就被KO。



魷魚泡菜煎餅

煎餅煎得香,中間有魷魚粒,雖說係泡菜,但唔辣,而係偏酸,小朋友都食到。



聖誕蛋糕冰沫 ($68)

泡冰之下係雪糕、蛋糕同鮮果,非常豐富,不單造型一流,而且甜甜既士多啤梨味好清新,非常喜歡,記得只限12月有得食!