湯品、燒味都一流！

想搵間靜局中餐廳洽談工作，我其中一個首選係逸東軒，皆因呢度坐得舒服，而且食物水準好好，尤其係湯品同燒味，仲有個蛋白杏仁茶 (掛住食唔記得影相)，都成日令我心掛掛！

 

 花膠花菇豬腱湯 ($145)

逸東軒既湯品可以話係必點，上次飲過佢地既signature「花膠鮮杏汁燉白肺」($128) 實在係極品，成碗湯都燉成奶水色，鮮甜濃郁，印象難忘。

今次試新野「花膠花菇豬腱」，用茶壺盛載，充滿中國風，一打開壺蓋，就見到真材實料，湯好甜，無多餘既油份，我係湯怪，想飲完一壺又一壺！

 

 燒味拼盆 ($280)

對於食燒味，我要求比較高，因為一塊靚叉燒同一塊硬柴柴叉燒，感覺真係天堂與地獄。逸東軒既叉燒屬於高水準貨色，半肥瘦、肉質軟熟、蜜汁夠，難得！燒肉質素亦好，豬皮燒到起泡，非常脆口，肉係五花腩肉，半肥瘦唔黐牙。

 

紫菜卷 ($118)

出面酒樓較少見到既點心，廚師用紫菜包住冬菇、紅蘿蔔等蔬果，然後沾漿粉去炸，外層香脆，入面仍保留蔬菜既香甜，唔錯。

 

 陳皮生煎雞 (半隻，$228)

用熱辣辣既鐵鍋上枱，熱力將葱花、陳皮同雞肉既香味迫晒出黎，香氣四溢。啖啖雞肉，肉質嫰滑，送飯一流。

 

 碧綠千島汁蝦球 ($320)

大蝦新鮮爽口，外層用炸漿包好，再以千島汁炒，酸酸甜甜好醒胃，又係送飯佳品。

勁抵食街坊日式放題

每當阿媽唔煮飯，我就會心思思想去樓下啟田商場既「富田和食亭」開餐，因為實在好抵食，我今晚周日黎到，每位$188 (另加一)，同去酒樓食餐飯差不多，但唔好忘記喎，呢度係任食，係任食呀！而且比起尖沙咀既日式放題餐廳，富田既選擇有過之而無不及。

周日晚黎到，座無虛設，唔訂位唔駛旨意有得食。

一坐低，侍應即刻遞上一套full set既菜單紙，夠細心。由串燒到火鍋共13張紙任點任食，飲品同甜品自己出去攞。

估唔到既係，飲品竟然有酒類，包括清酒同梅酒 (另有啤酒)，感覺特別抵。

先攻刺身。呢度有唔少選擇，而且因為人客多，流量大，所以食材都新鮮。我好鍾意食馬刀貝，但唔係度度有，見到梗係立即喪叫！馬刀貝好爽口，咬落索索聲，正！生蝦有甜蝦同虎蝦兩種選擇，前者肉質夠甜，後者勝在爽口，兩款蝦都新鮮味美！

壽司之中，特別推薦火炙和牛壽司，薄薄既一塊牛肉，面層被燒得焦香，底層仍然保持生生地，面頭加左少少煮過既蒜蓉，勁香口，如果唔係要留肚食其他野，我會encore再encore呢個。

其他仲點左串燒、天婦羅同泰式小食，全部都水準中上，鍾意食乜，悉隨尊便。

反而想講下甜品，出面好多日式放題只提供雀巢雪糕，呢度都有，但仲加上泡芙、啫喱、百福豆腐花同雪條！必試馳名沙巴Potong榴槤雪條，充滿榴槤果香，真材實料！

食得好滿足！ -- Playa de Papagayo

西班牙餐廳Playa de Papagayo響尖沙咀有兩間分店，一間響河內道，另一間新開既就響天文台道，新店環境更舒適，座位更闊落，約埋成班朋友黎吹水都無問題。

成間餐廳以海藍同淺灰色為主調，感覺好柔和舒服；牆上既壁畫同menu圖案一致，屬餐廳獨有特色。

Lychee Punch (HH, $42) + Regular Sangria (HH, $52)

黎得西班牙餐廳，點少得一杯Sangria？我點左一杯Regula，用紅酒、橙汁同檸檬汽水調製，再加入新鮮檸檬、青檸、士多啤梨同青蘋果，浸六小時而成。

Sangria味道甜甜地，好易入口，最特別係佢加入左一條肉桂做攪攪棒，雖然飲時唔會有肉桂味，但每當我去呷一口既時候，就會聞到淡淡既肉桂香味，色香味全，讚！

唔好杯中物，都有唔少Mocktail選擇，例如圖左呢杯Lychee Punch，就以荔枝汁、蘋果汁、檸檬汽水製成，加入青蘋果粒粒，味道清新。

(順帶一提，呢度每日中午12點至晚上9點都係Happy Hour (HH)，飲品有特價；如果鍾意飲酒，每逢公假同周末 (中午12點至下午4點)，又有紅、白酒及Cava $138任飲，一個字：抵飲。)

野生八爪魚薄切配紅菜頭珍珠 ($108)

呢道係Fusion菜，大廚將紅菜頭整成一粒粒珍珠，甜甜地，口感似啫喱，幾得意。八爪魚係生食既，切到好薄，配埋酸甜汁，夠開胃！

西班牙烤乳豬件配酸椰菜 (小，$88)

西班牙烤乳豬係我既至愛，呢碟乳豬仔肥瘦均稱，乳豬皮香脆 (但厚左少少)，點埋個甜介辣食，都算唔錯。

滋味拼盤 ($168)

西班牙菜勝在多Tapas選擇，花多眼亂唔知揀乜好？可以試下呢個「滋味拼盤」，一次過試晒餐廳既主打小食，包括有：豬仔骨、芝士豬肉丸、蟹肉金卷、黑松露雞脆卷、辣味八爪魚。

我特別喜歡個辣味八爪魚，食落完全無渣，水準之作；蟹肉金卷都好好，因為有我最鍾意既牛油果醬同蟹肉做餡！

香草牛油焗原隻龍蝦 ($268)

但講到成餐飯我最鍾意既，就一定係呢隻龍蝦，啖啖肉，好鮮甜，面頭既牛油焗得鹹香惹味，令到海鮮既甜味更突出；更更更重要既係，隻龍蝦係有膏既！蝦膏好幼滑，嗒落回甘，好好味，而家諗起都仲流口水！

焗鮮奶芒果+紅莓雪葩 ($68)

另一驚艷之作係紅莓雪葩。紅莓味道好濃，酸味突出，每食完一啖都要再細細嗒下，好impressive；個底係用甜奶浸住既新鮮芒果塊同士多啤梨粒，微酸既生果同甜奶好夾，再加上面層既木糠，更添豐富口感。

焦糖花生雪條棒 ($58)

面層既焦糖好厚，幸福既甜味；入面既雪糕好Rich，口感有D似食牛油，記得灑上木糠食，更加美味！

吖，再多一個著數情報：而家中午12點到下午5點幫襯Playa de Papagayo，餐牌內所有食物都有七折優惠，唔知做到幾時，要食就趁早啦！

白布街靚靚甜品店

唔係朋友帶我黎，都唔知旺角白布街呢頭開左咁多靚餐廳，當中唔少都係甜品店，間間都好吸引，選擇困難症發作，唔知揀乜好之際，英明既朋友就揀左呢間唔識讀既Pheromone Dessert (唔識讀應該高級D，【誤】)。

窗明几淨，裝修有少少法國風情，女仔一定鍾意。

布朗尼棉花堡 ($68)

呢個造型夠殺食！面頭係勁搶眼既爆炸糖 + 棉花糖，好有童年回憶呀！揭開個頂，入面係滑溜雲呢拿雪糕，另加左朱古力脆粒粒、杏仁片，夠香口，當然仲有另一個主角brownie，朱古力味濃，大滿足！

抹茶丸子果凍 ($58)

係抹茶雪糕加上甜甜既紅豆同清淡既糯米丸子，好有日本風情。

抹茶窩心一刻 ($118)

呢個最大堆頭，有齊窩夫、心太軟、雪糕、蛋卷！其中以心太軟既抹茶味最甜最出眾，用刀一切開，入面既抹茶漿即刻爆出黎，味道好濃郁；底層既waffle抹茶味一樣突出，不過今次就苦澀味較重，剛好中和番雪糕同心太軟既甜膩。

一次過滿足到咁多個抹茶願望，抹茶控必試。

想響旺角靜靜地食餐日本料理？

近年已經好少出旺角食飯，一來怕人多，二來實在中過好多次伏，「旺角餐廳 = 難食」呢個觀念，早已紮根響我腦中。

不過呢日咁啱要出旺角，又咁啱響彌敦道見到「鮨心」雞乸咁大既廣告招牌，既然係樓上舖，我估起碼會坐得舒服，一於上去探下險。

餐廳位於一樓，裝修好簡單舒服，牆上有一幅漁民壁畫，好有日本風情。令我意外既係，估唔到有咁多識途老馬上黎「搵食」，令我對餐廳既信心立時加倍。

今日係周末，仍然有唔少午市套餐選擇。最抵食一定係鯖魚啦，不過我嘴刁，想食更滑溜既銀鱈魚。

先黎前菜，有醋汁沙律，外表平平無奇，但我覺得個醋汁調校得幾好，酸咪咪，加埋新鮮蔬菜、番茄、粟米粒，好食；另一碟係炆牛舌，炆得好腍，就等我黎個激烈既French Kiss啦！

再黎麵豉湯同蒸蛋。前者有好多豆腐卜，都切成幼絲，唔會食到一口都係，我更鍾意秋葵，充滿水溶性纖維，好健康！

個蒸蛋，點解好似水汪汪咁既，我食左一半就放棄左，估唔到餐廳經理勁細心，見到我既「遺物」後，立即送上一個新既蒸蛋俾我，話剛才果個做得唔好，唔好意思！嘩，勁感動！呢個對勁啦，滑溜無比，材料又足，再加上咁好既服務，馬上爆Like！

西京燒銀鱈魚定食 ($168)

主菜黎啦，銀鱈魚外皮煎得好脆，充滿油香，甜甜既燒汁，滑溜既魚肉，完全無腥味，你係得既！扒埋碗日本飯，好滿足！