必食炭燒軟腍鮑魚仔

我呢位觀塘友，今晚被朋友帶到去元朗搵食，估唔到，原來鳳攸南街一帶咁多食肆，真係大開眼界！心大心細，揀黎揀去，最終入左一間叫「逸之燒」既食店。

既然門面話主打串燒，無理由唔試既，個肚好餓，立即叫左一大堆黎食：

雞泡魚乾 (半客，$38)

燒日本芝士魚蛋 ($16)，鹽燒牛舌串 ($32)

章魚小丸串 ($16)

鹽燒雞腎串 ($21)

汁燒大蔥串 ($18)

冬菇串 ($18)

鹽燒多春魚 (兩條，$24)

七味珍寶帆立貝串 ($49)

明太子雞翼 ($22)

印象最深刻既係雞泡魚乾，試過出面好多食肆既雞泡魚乾都硬過條柴，但呢度就燒得既香且軟，甜甜地好惹味，再加上我至愛既沙律醬食，好得！

芝士魚蛋同牛舌都唔錯，前者咬開有溶化左既芝士，香噴噴；後者軟腍無渣，一啖一塊非常滿足！

值得一讚既仲有冬菇串，我係重口味人，一向覺得鮮冬菇無乜味，但餐廳師傅就好聰明咁加上左木魚絲，吊出鮮味，令冬菇更香更有口感！

最後就係明太子雞翼，外層燒到脆卜卜，味道微辣，入面係啖啖明太子同雞肉，好食！

沖繩網燒鮑魚仔 (四隻，$156)

呢個係我既必食推介！朋友話好怕食鮑魚，因為怕黐牙，但呢個網燒鮑魚就完全無呢個問題，因為鮑魚軟腍入味。四隻鮑魚仔用炭爐原隻上，師傅好細心咁將每隻切開三塊，等大家食得斯文，甜甜既燒汁加上炭燒香味，$156呢個價錢實在抵食！

清酒煮蜆 ($72)

味道比較清淡，蜆肉雖然唔大，不過依然啖啖肉，分量足，係追求健康人士既首選。

松葉蟹粥 ($98)

單睇粥面就知蟹肉係幾多同幾大舊，絕對唔係hea我！材料方面，仲有生雞蛋、紫菜、紅蘿蔔、菜絲、冬菇等等，成個粥好清，一滴油都無，但味道夠。我食唔晒打包第二朝做早餐，叮番熱食都依然係咁回味無窮！