得意到無朋友既Cocktail！

星期三，開完長命會終於可以收工，呢個時候，有咩好得過約埋三五知己，去酒吧飲杯野食個飯吹下水？New toilet，朋友話何文田站開左，不如去果邊既酒吧Mini Club試下。

呢一試，不得了，一試愛上！

酒吧以藍色為主調，夠晒Cool！入面設置左個電話亭，可以行入去作狀影下相，都幾得意。

打開menu，見到好多造型cute爆既雞尾酒，三個女仔即刻發癲！唔理咩味住，揀左三杯最可愛既先！

What the Duck ($108，20:30前八折)

浴缸+泡泡+黃鴨，造型殺晒無得輸！Cocktail用青蘋果、奇異果、菠蘿汁、Cranberry汁同石榴製成，味道偏酸，感覺清新，旁邊有爆炸糖，倒入飲品即刻pik lik pak lak，好過癮！

Honey Bee ($108，20:30前八折)

材料有金萬利、荷蘭蛋酒、百利甜酒、菠蘿汁同桃汁，另外仲加左一小杯蜜糖同一細塊新鮮honeycomb，味道甜絲絲，食埋塊甜餅更幸福！

Drink Mud? ($108，20:30前八折)

Drink Mud？飲乜？咪就係百利甜酒+牛奶+朱古力糖漿+Dark Rum，我最鍾意Oreo製品，所以呢個實在好啱feel，如果自問唔太飲得，可以唔加杯冧酒入去，咁就會更容易入口。

生蠔 (South Africa及Britany，$131)

兩款生蠔分別黎自南非同法國，前者size較細，口感非常creamy，海水味較淡；後者相對大隻，質感爽口，海水味更豐富，金屬味唔強，啱食！

海鮮拼盤 ($254)

二百幾蚊實在非常抵食，因為用料好靚！齋睇隻法國麵包蟹同龍蝦，D膏多到爆廠就知！鮑魚鮮味香濃，海螺爽口，青口細嫰，全部都好好食，估唔到酒吧都有咁好既水準！

一般海鮮拼盤既海鮮都係煮熟既，但今次大蝦係刺身，有唔錯既鮮味，加少少海鮮汁，完勝！

海之幸福摩天輪 ($104)

飲酒又點少得炸物？呢個海鮮摩天輪就啱數。上面有炸魚手指、鮮蝦、帶子、蠔、蟹箝、魷魚圈等等，食完驚流鼻血？唔駛驚，最後一盆係沙律，食多兩件青瓜就無事！

漢堡扒伴芝士焗肉醬意粉 ($96)

芝士多到爆燈，可以做出強勁既拉絲效果！肉醬既分量多，味道偏酸，記得將意粉撈到底，咁味道就啱啱好勒！

充滿魚香既Sake！(有片)

今晚又去銅記搵食，同樣係Times Square旁邊，不過今次係去布滿日式食肆既登龍街。因為唔想排隊排到天荒地老，於是摸左去永光中心11樓既勝八居酒屋。

餐廳裝修同真既日式居酒屋無異，令人頓時好似走左去日本咁，度假feel返晒黎！

鳥海山 (720ml，$450)

魚鮨清酒 ($48)

咁高興，不如先飲番兩杯！「鳥海山」甜味頗重，容易入喉，好啱女仔飲；「魚鮨清酒」用雞泡魚魚鮨放入清酒度燒，部分酒精被揮發後，令酒味濃度減低，同時加入左魚翅味，飲時感覺好特別，既好似飲緊魚翅湯，又係飲緊清酒，未試過既朋友好值得一試。

海葡萄沙律

海葡萄係沖繩特產，又有「綠色魚子醬」之稱，含有大量DHA，可以減低膽固醇同血壓，非常有益！食起上黎卜卜聲，帶有海水味，同魚生或沙律都好夾。

生帆立貝 ($120)，黑鯛刺身 ($138)，安康魚肝 ($98)

帆立貝超級大粒同厚肉，咬落鮮甜唔黏口，我既超級大愛！黑鯛魚味香濃，同中間既蔥芽好配合；魚肝既質感同鵝肝相似，但多左一種魚鮮味，鍾意食魚既朋友定會一吃愛上。

蔥吞拿魚腩卷 (六件，$156)

吞拿魚腩十分肥美，味道清淡，夾埋蔥花食，更能帶出鮮味，只需點少少芥辣同豉油，已經好美味！

目光魚 (三條，$144)

目光魚屬白肉魚，係一種味道清淡既高級魚鮮，魚身含有魚油，食起黎都幾滑，經過油炸，外層尤其香脆，用黎送酒一流！

辛口牛腸鍋 ($198)

湯底係麵豉湯，微辣，入面係嫰滑牛腸同略帶煙靭既蒟蒻，一濃一淡，好食。

日本燒蠔 (三隻，$174)

燒蠔唔算大隻，但蠔身飽滿。咬落去好柔滑，食完要飲埋湯汁先夠滿足。

牛舌串燒 ，煙肉露筍 (各三串，各$114)

雞軟骨串燒 (三串，$54)

幾款串燒之中，以牛舌最出色：厚肉、細嫰、爽口，面頭只以少量海鹽同黑椒調味，已經相當美味。

三色雪糕

分別係芝麻、芋頭同菠蘿，我like爆菠蘿味，因為入面有新鮮菠蘿肉，味道清新，如果可以，我下次想要三球都係菠蘿味，哈哈！

無錢買Bentley，都可以去Bentley's Cafe嘆杯啡！

眾所周知，Bentley係英國名車，小女子自問無本事買，但佢間Cafe我仲幫襯得起既！

最近觀塘偉業街開左一間Bentley汽車陳列室，而響佢旁邊，正正就係同品牌既Bentley's Cafe。

成間Cafe窗明几淨，未食之前已經被深深吸引！睇下個lunch menu，包沙律/餐湯、主菜、飲品，價錢由$108至$138，講真唔算平，但比起好多寂寂無聞既觀塘餐廳仔，呢度既消費亦絕對唔算貴。(目前餐廳只提供早餐、午餐、下午茶，無晚餐供應。)

我同同事一行七人，全部叫晒「蟹肉濃湯」。濃湯帶番茄味，酸酸地，夠creamy，湯內有少量蟹肉，點埋蒜蓉包食，味道唔錯。

南瓜燴牛肋 ($108)

意式鮮蝦炒意大利粉 ($108)

香煎鮮紅立魚柳配蟹肉薑酒汁 ($108)

我點既係鮮蝦意粉，再偷食埋同事既選擇。牛肋算嫰滑，但我覺得可以再炆腍D，南瓜好甜好好味；魚柳外層煎得微焦，肉質OK，但有略帶腥味，可以再改進一下。

至於我既鮮蝦意粉，係最好味既！大蝦鮮甜又惹味，蝦頭有蝦膏；意粉用洋蔥、燈籠椒等炒香，整體感覺都好，果然我係最有眼光既！

Mocha

Hot Chocolate

餐飲本來可以揀果汁，但竟然售罄，咁一於試下咖啡同熱朱。咖啡甜度適中，有咖啡香；朱古力同樣唔會太heavy，有朱古力味之餘，飲完唔覺滯，幾好。

如果你係車迷，記得響落柯打時講明要個Bentley logo放到飲品上，用黎呃like一流！

手指咁長既加拿大海膽

意大利餐廳Barg位於銅鑼灣耀華街既百樂中心，即Times Square旁邊，方便就腳之餘，地方大又唔駛同人迫，夜晚黎食飯實在very good。

餐廳裝修充滿歐陸風情，大枱頗多，座位寬敞，成班朋友黎吹水食飯都舒服。

點餐之後，經理先送上麵包，又暖又脆，仲可以加埋原隻焗蒜頭或香草牛油黎食，我最鍾意就係蒜頭，單係食包已經不亦樂乎！

加拿大海膽 ($128)

每一塊海膽都有成隻手指咁長，海膽鮮甜唔腥，有香濃海膽味，而且質感軟滑，唔駛加任何調味，就咁用紫菜包住食，已經好味到爆炸，大推！

香辣肉腸煮青口 ($168)

青口細細隻，新鮮嫰滑，汁底用茄膏同辣肉腸煮成，帶微酸同辣，夠醒胃，用黎點餐包食都好正。

牛頰肉菠菜意大利飯

牛頰肉軟腍入味，感覺有D似食牛腩，但帶有更多類似牛筋既質感，好多骨膠原呀！意大利飯好creamy，面頭灑滿芝士，廚師巧妙咁加入菠菜，成功減低意大利飯既膩滯感。

香燒美國豬肋骨 (半份，$198)

牛肋骨經過slow cook，肉質軟腍，容易離骨；面頭既BBQ醬調校得好，唔會太酸或過甜，好好食，係海膽以外既另一推介。

從未食過咁嚡既Slow Cook!

公司最近由尖沙咀搬左去觀塘，所以呢排都不斷探索呢頭有咩好餐廳食lunch。響鴻圖道有一間餐廳叫The Hunt Coffee & Roastery，外觀唔錯，雖然午餐收百幾蚊絕對唔平，不過仍然忍痛黎試試。

話雖午餐唔平，不過點餐仍然係要自己去counter買，呢點令我感到頗意外！百幾蚊，竟然無乜service！

我今日點既係Slow Cook Pork Rack ($138)，包一杯飲品，我揀左Honey Lime。上枱好靚，木板盛載，好grand，個肉汁係另外用透明杯仔裝開，仲插條草添，造型真係100分！

Honey Lime落足本，好多蜜糖，太甜，好彩我無攪到落底，所以味道都OK。

至於個豬柳，好嚡，無諗過slow cook可以煮到咁嚡，我食左一半就放棄左；反而個薯條幾好，灑上左味粉，好似shake shake薯條，係今餐最美味既一環。