必食外脆內軟蒜香包

久唔久就戚起條筋想食泰國菜，今晚又發作，朋友開車經過呢間「亞萊嘜嘜」，個名咁得意，門口又排左條長龍，一定係好野，一於黎試下。

「如果太多牛奶味，朱古力味無椗企，等到朱古力味多得黎，牛奶味又唔爭氣……」朱古力奶係咁，其實冬蔭公都同樣道理，太辣或太酸都唔好味。呢個「冬蔭公湯(小，$88)」既味道拿捏得唔錯，酸辣並重又唔會過左火位，海鮮材料豐富，大家不妨試試。

我最鍾意食泰式咖喱蟹，但可惜我朋友唔鍾意食蟹，嫌「骨charm charm」好麻煩，唔緊要，我順得人，叫呢個「招牌咖喱軟殼蟹($188)」就兩全其美。軟殼蟹啖啖肉，而且分量多，食得我好開心！最緊要係留番個咖喱汁，用黎點下面既蒜香包。

「蒜香包($42)」賣相靚爆鏡，成堆金磚咁，每條都肥大肉厚，外層酥脆內層鬆軟，就咁食已經叫我食唔停口，點埋個咖喱汁食，我成晚只食呢樣都夠晒滿足！

「牛油雞中翼($68)」味道香濃，可惜肉質比較乾身，稍嫌不足。

「馬拉盞炒椰菜苗($72)」，調味唔錯，廚師煮得比較腍身入味，我個人都幾鍾意，但如果你喜歡較爽脆既口感，就要先同侍應單聲啦。