高品質日式串燒

銅鑼灣澳門逸園中心有唔少日式餐廳，之前試過漁獲浜燒，呢晚再試同樣有唔少好評既鳥居居酒屋。

餐廳設有開放式串燒bar，全部串燒新鮮燒成，單憑呢陣香氣，已經叫我決定陣間要叫番幾串。

蟹肉芝麻凍菠菜 ($48)

較少食菠菜沙律，所以叫左一客「蟹肉芝麻凍菠菜」試試。麻醬分量頗多，味道偏酸，令人精神為之一振！蔬菜新鮮碧綠，係清新既開胃菜。

馬糞海膽 ($148)

成板海膽咁上，實在令人興奮！海膽鮮甜、味濃，每塊紫菜夾一行海膽食，奢華得令人快樂！

原條燒茄子 ($78)

茄子之上係蒜蓉同沙律醬，味道帶點辛辣，同味淡既茄子配合得好好，無乜肥膩感，好食！

雞頸肉 ($28/串)

聽侍應介紹，雞頸肉係由餐廳師傅每日用雞頸起肉做，出面餐廳好少食得到。雞頸肉較一般雞肉煙靭爽口，而且不含肥肉，幾特別。

厚切牛舌 ($58/串)

牛舌又厚又腍，只用黑椒同鹽去調味，證明只要食材好，簡單既烹調已經味道出眾。

黑牛頂業片 ($68/串)

美國牛肩脊位，中間有筋位，爽而不靭，面頭加上芥末子，帶點酸同辣，有畫龍點睛之效。

明太子雞翼 ($58/串)

一端上枱，已經聞到雞皮既陣陣香味；明太子分量好足，味道微辣，好食。

雞丸 ($58/串)

雞丸即免治雞肉串，啖啖肉，加埋一隻生雞蛋俾你醮，增添左蛋香。

白鱔 ($48/串)

最後係白鱔，肉質爽口彈牙，師傅將魚皮完全燒脆燒香，必食之選！

尖沙咀區樓上Fine Dining

想響尖沙咀區靜靜地食餐好，可以試下金馬倫道既Amina Modern European，呢度提供高級fine dining同生蠔等高級法國同意大利菜。

餐廳細細，只有五六張枱，近bar枱放滿唔同品種既生蠔，朋友食完三隻再三隻，話好耐無食過咁美味既生蠔！

必須講下個餐牌，一本有星，一本無星，究竟有乜唔同？原來有星果本係有標價錢，只給男士；無星果本就俾女士，即是女士食野唔駛睇價錢！呢條橋我勁buy，男士們要突顯風度，而家係時候啦！

我地今晚揀左十道菜既餐單，每位$1,180。

餐上小品

平時食巴拿馬火腿，梗係要夾塊新鮮蜜瓜/哈密瓜肉一齊食，今晚餐廳就搞搞新意思，將蜜瓜變成一杯充滿瓜蓉既汁，非常清新甜美，而且飲起黎好方便，啱晒要顧全儀態既女士。

自家製麵包及特式醬

有牛油麵包同提子合桃麵包，全部都烤到面頭脆卜卜，旁邊配以蜜糖甘筍醬，甜甜既味道，正式開始今晚既盛宴啦！

輕煎北海道帶子

帶子只係經過輕煎，面頭有焦香，裡面仍然係刺身，有雙重口感；墊底既係近年被奉為super food既藜麥，含有豐富蛋白質，而且不含脂肪，旁邊再加上椰菜花奶泡，甜甜地，健康之選。

美國穀飼牛肉他他

他他除生牛肉之外，仲加入左酸瓜、蒜頭、黑醋，味道帶點辛辣；唔好錯過伴碟既黑醋粒，係用分子料理製成，又靚又有實際功用。

法國野豬肩肉凍

豬肩肉凍調味剛好，中間粉紅色既係鵝肝，濃香味美。肉凍之下係紅菜頭沙律，又甜又新鮮，唔錯。

龍蝦忌廉濃湯

好多龍蝦湯都偏鹹，呢個剛相反，竟然帶有甜味；伴碟既係炒香左既龍蝦子，想湯既味道濃一D，可以將龍蝦子加入湯中，夠晒心思。

香煎法國鵝肝

鵝肝唔算厚，但煎得好香，面頭係粗鹽同黑椒，點埋旁邊酸酸甜甜既士多啤梨汁，簡單而味美；鵝肝底下係薑餅碎，一黎可以索油，二黎味道都確係唔差；旁邊既係紅酒天使麵，味道唔太突出。

檸檬木煙燻阿拉斯加蟹肉

上枱時用罩蓋著，開蓋後入面既煙先慢慢飇出黎。成個蟹肉有好香煙燻味道，伴以旁邊既柚子醬、海草珠食，夠開胃。

水果雪葩

食到而家，係時候清一清味蕾，迎接主菜啦。呢晚係番石榴雪葩，清香甜美。

澳洲M9和牛肉眼扒

牛扒好有水準！有肉味，面層焦香，內裡仍保持肉汁；配以黑松露燒汁，多添一份香氣。

法式春雞

春雞本身已經夠嫰，餐廳仲加以香蒜牛油去slow cook，非常嫰滑！春雞之下係雅枝竹蓉，雅枝竹又有蔬菜之王既美譽，因為佢營養豐富，而且含豐富蛋白質同鐵質，卡路里超低，我呢晚第一次食，味道有點酸和澀，係幾新鮮既體驗。旁邊既大蔥，靚到好似藝術品咁，清新鮮甜。

自家製海鹽焦糖蛋糕

蛋糕都做得出色，單睇橫切面就見到係由多重材料做成，非常花心思。我鍾意入面既脆片，好脆好輕盈；旁邊仲有件朱古力雪糕泡芙，冰冰涼涼，濃重朱古力味，一個字：好！

雪影

咖啡/ 茶

雪影其實係五粒朱古力，包括黑朱古力、Truffle、士多啤梨、Raspberry、榛子，怕甜膩？唔駛驚，因為最後仲可以選唔同既花茶去解膩，咁就完成圓滿既一餐啦！

男神？壽司之神！

響元朗，有一間門面絕不起眼既小店叫「壽司之神」，入面有一位非常靚仔既男神壽司師傅，佢單止睇得，而且仲係有姿勢有實際，整出黎既壽司同師傅一樣咁靚仔，叫人尖叫連連！

建議大家坐吧枱，既可望靚仔，亦可以欣賞師傅出神入化既手藝，一邊食一邊好似睇表演咁，目不暇給！呢餐Omakase每人1,000元，一齊睇下有咩食：

前菜：淮山、紫薑、蒜頭、海帶

淮山加左wasabi，新鮮爽口；紫薑幼嫰，酸甜無渣；蒜頭用麵豉醃過，沒有辛辣，反而係帶有陣陣甜味。

前菜：豆腐、白子、虎蝦

豆腐嫰滑，面頭醬汁用七種野菜打成，再夾埋鮮香既木魚絲，味道相當平衡；白子乃鮮魚既精巢，味道清淡，據說有補身之效，師傅加上酸汁啫喱調味，又係好好既配搭；最後係加上左松露同食用金箔既虎蝦，蝦身爽口鮮甜，松露濃香，無論視覺同味蕾都得到滿足！

薄切左口魚刺身

將左口魚薄切，夾上芽蔥，味道清香；面頭加上柚子汁同蘿蔔蓉，好有提鮮作用。

帶子壽司

帶子鮮甜，師傅只用岩鹽同青檸汁去調味，已能吃出美味！

赤貝刺身

赤貝新鮮，爽口鮮甜，師傅響處理貝類時，會拍一拍貝身，等佢神經收縮，咁食起黎就更加爽口啦！

黑鯥魚刺身

鯥魚本身既味道比較清淡，但師傅將魚皮燒脆燒香，再點上薑蔥豉油去食，咁就very good啦。

鯖魚壽司

好多時鯖魚都會帶有腥味，但呢度既用料新鮮，所以完全無腥味，反而係有魚鮮味。

針魚壽司

針魚味道清淡，爽口而煙靭，配埋面頭既蔥花、薑蓉、蘿蔔蓉，又靚又好食。

左口魚壽司

左口魚本身多油，所以師傅叮囑要由底夾起，否則魚油就會整散壽司飯。魚身滑溜，帶有魚香，面頭燒熟而裡面仍保持刺身感覺，一次過滿足兩個願望。

新鮮北寄貝壽司

同樣，師傅都係將北寄貝拍打過，等佢神經收縮後先上枱。北寄貝爽口鮮甜，水準之作。

海膽壽司

鹽水海膽細細粒，但好鮮甜，由於師傅係每款即時製作，所以軍艦上既紫菜仍然好脆口，滿分！

拖羅壽司

大拖羅，油花分佈平均，夠肥美；面頭既係紫蘇葉，好鍾意呢種香味。

餐廳非常細心，前半段既壽司都係用白醋米做，而食到中段以後，就會換上赤醋米，酸味更濃，咁就可以減低飽滯感。

海鰻壽司

汁煮海鰻之後，輕燒鰻魚表面，再加上鰻魚汁、岩鹽、柚子皮，呢個煮法令鰻魚比較腍身，表面帶有鰻魚焦香，甜甜既味道好幸福！

白飯魚脆片 + 蒲燒鰻魚

相比起黎，我更喜歡呢個蒲燒鰻魚。師傅將鰻魚由生燒到熟，所以鰻魚質感更煙靭、更有咬口，魚味亦更濃，好好食，令人驚艷。

竹簽魚壽司

魚肉較腍身，但魚味濃郁，係另一件藝術創作。

燒拖羅壽司

拖羅刺身試得多，燒拖羅又試過未？師傅特登燒一件俾我試下，面頭焦香，油分足，同時又帶有刺身既爽口，美味！

筋子壽司

筋子其實都係三文魚子，不過係新鮮由魚腹取出，所以食用時魚子仍然被卵膜包住，比加工過既魚子會鮮味好多！師傅用柚子汁、酒、豉油等醃製過，能去腥之餘，更能帶出魚子既鮮香。食既時候，魚子響口腔爆開，就好似食緊爆炸糖咁，嘭嘭聲爆開晒，係非常有趣既體驗！

深海池魚清湯

湯內加入左本菇同日本米通，魚肉又香，食左咁多冷冰冰既壽司刺身，飲番碗熱湯感覺非常良好！

特大紅豆雪糕

芝士豆腐布甸

紅豆又大又甜，同雪糕永遠都咁夾；布甸好香豆腐味，反而芝士味唔太濃烈，啱我。食完呢兩個甜品，今次既壽司盛宴就圓滿結束啦。