2016年10月31日 星期一

必食每日限量BB鴿!

朋友話,最近響尖沙咀食過一間樓上餐廳,食物質素相當唔錯,所以帶我黎到呢間位於19樓既CHEF STAGE de Eddy Chu。



餐廳比較細小,唔少座位都坐擁無敵維港景,可能我地遲訂位,窗邊位無晒,要坐走廊位,有D逼狹,下次惟有早D訂枱。



Fantasy Holiday ($50)


Pineapple Mojito ($50)

先黎兩杯飲品。Fantasy Holiday由新鮮士多啤梨同藍莓打成,再加上伏特加、cranberry juice、青檸、士多啤梨酒等製成;Pineapple Mojito則用上新鮮菠蘿,配以冧酒、青檸及菠蘿汁、梳打水調製;前者甜美,後者清新,各有特色,兩款都好啱女仔飲!




燒吞拿魚沙律 ($128)

主角燒吞拿魚外層燒得香,內裡仍保持粉嫰,有魚香,唔錯;配菜更有驚喜,菠蘿清甜無渣,加上西柚味啫喱珠,一咬即爆,非常過瘾;個汁加入左青芥辣,少少嗆鼻既刺激感,成碟沙律配搭得好,讚!



艾迪乳鴿 (每日限量,$98)

呢晚食過最喜歡既菜式。據經理介紹,因為準備功夫多、醃製時間長,所以乳鴿每日只供應8至10隻。一拎上手,乳鴿熱辣辣,鴿皮被輕輕油泡過,酥脆得黎唔會乾身;更不得了係鴿肉,非常細嫰同入味。其實以我個人黎講,可以一次食三隻,哈哈!




King Prawn Toast ($168)

從來無見過咁大塊蝦多士,有我成隻手掌咁大!據知,呢度既蝦多士係用虎蝦做,將蝦拍扁,再夾入wasabi汁麵包去炸。蝦多士非常脆口,由於鮮蝦係原隻上而唔係打成蝦膠,所以更有質感,點埋旁邊既芥辣沙律食,醒神!




法式燴海鮮配美國鱈魚 ($258)

鱈魚係今晚既廚師推介,叫左一份黎試。老實講,個賣相有D麻麻,唔係咁吸引,不過我會形容佢係「實而不華」,鱈魚好大塊,有油香,魚肉一片片非常實淨有質感;帶子厚肉鮮甜,可以用刀叉黎享受;食食下突然發現有隻原隻鮑魚,執到寶咁開心!鮑魚煮得腍身入味,非常出色。最後唔好忘記飲個魚湯,濃厚鮮味,仲食到底部既薏米同芋頭蓉,估唔到,一道菜可以有咁特別同複雜既配搭,喜愛海鮮既朋友唔好錯過。



燒西班牙黑毛豬肉眼蓋 ($188)

最後係黑毛豬肉眼蓋,肉腍無渣,有肉香,面頭只用少少鹽去調味,簡單就是美,成碟有成三塊肉眼咁多,分量好足,呢個價錢算係抵食啦!



2016年10月30日 星期日

秋季限定甘栗焙茶芭菲

久唔久就會心思思想去食京林屋,鍾意呢度既裝修、食物,更重要係食完可以繼續行街。





好日式既裝修,好喜歡,每次入到黎都好想坐獨立雅座,可惜次次黎到都無緣。


桃味焙茶 (左,$42);錦上之花煎茶 (跟餐)

桃茶味道清香,好香但唔會有甜味,鬈毛媽有糖尿都飲得;煎茶係清淡既綠茶,嗒落有餘韻,沖泡三杯後仍有茶香。


稻庭麵 (上,$68);讚岐烏冬 ($68)

之前響度食過冷麵,感覺唔錯,今日天氣轉涼,就試熱湯麵啦!呢兩款麵都好滑,我尤其喜歡烏冬,滑中之滑,魚蛋有少少過腍,不過整體上,湯底同烏冬都非常好。



甘栗焙茶芭菲 (套餐連茶,$118)

秋季栗子最靚,所以餐廳都期間限定咁加入左呢款甘栗焙茶芭菲。除左平時食到既茶味雪糕、啫喱、紅豆、脆米之外,甜品內仲加入左一粒栗子同一層栗蓉,甜甜既味道,好幸福!




秘製抹茶蕨餅 ($88)

每次黎京林屋,總見到隔籬枱有人食呢款蕨餅,今次我地都叫黎試下。蕨餅本身好軟滑,帶有淡淡既抹茶同甜味,鬈毛媽食都唔覺太甜;我食既話,就加埋糖漿同綠茶粉,更香更甜,好味道!


來一頓簡單的西班牙Brunch

西營盤第三街有好多細細間、有特色既食肆,其中之一就係Chico Chica。




餐廳細細,但座無虛設,呢度係食西班牙菜同一D Fushion菜式,周六中午黎到,餐廳有Brunch提供,$148/位,兩位起,加$128可以任飲Sangria、Cava或紅白酒,今日唔飲酒啦,慳番D啦。



Bread Tomato + Serrano

番茄麵包烤得香脆,只用茄醬、蒜蓉、橄欖油調味,簡單得黎好味;黑毛豬火腿好香,無渣、無臭豬味,柔軟鹹香。



Truffle Jamon Bikini

麵包外層烤得微焦,脆卜卜兼有牛油香,入面係黑松露醬,濃重既香味,好快就將佢KO。


Spanish Broken Egg

呢碟製法都唔複雜,香腸+太陽蛋+薯仔粒,我最欣賞係放底層既薯仔,細細粒易入口,帶有薯仔既天然甜味,又係簡單自然既美味。



Seafood Paella

西班牙海鮮飯,飯底吸晒海鮮既精華,入味!面頭既海鮮好多,如鮮蝦、魷魚、蜆、青口等等,全部都新鮮,特別鍾意兩隻蝦,非常鮮甜。底部有飯焦,好此道者會食得特別開心。



Hot Chocolate

餐飲我選擇左熱朱古力,甜美香濃,飲到啖啖朱古力粒,真材實料,大愛!



 最後埋單,張單竟然用紅色點心籠送黎,搶眼又特別,俾錢都俾得開心D!


2016年10月28日 星期五

如果你係大胃王……

如果你係大胃王,可以去試下「倫哥火鍋私房菜」,因為佢既無限時任食海鮮火鍋,分量真係好驚人,莫講話可以無限order,就連佢預左每人一份既,我地都食唔完!

呢個餐位位收$278,驚大家睇唔清楚,我將個清單打一次出黎:


‧ 環游海鮮盤 (生蠔、八爪魚、細蟶子、鴛鴦海蝦、龍躉、白鱔、脆鯇魚、魷魚、刀貝、鑽石蜆),每次提供6-9款
‧ 涼茶及汽水任飲
‧ 太湖大閘蟹
‧ 蠔皇扣鮑魚
‧ 蒜蓉金菇蒸蟶子皇/ 象拔蚌BB
‧ 招牌雞煲
‧ 蟹鍋/ 龍蝦鍋 (另加$30)
‧ 手切牛頸脊
‧ 手打四寶丸
‧ 雲吞水餃
‧ 響鈴、炸魚皮
‧ 蔬菜
‧ 墨魚滑

真係打都打到手軟!但係多係無用既,好唔好食呢?



我黎到既時候已經係夜晚八點幾,全場滿座。


先黎熟食 -- 兩隻鮑魚。鮑魚size係細既,不過炆得好入味,夠腍身,有鮑魚鮮味,呢D貴價野當然無得任添,但無緊要,因為我仲要迎接黎緊既N樣食物!



接住係每人一隻大閘蟹。兩隻都係蟹公黎,D膏夠濃夠綿滑,熱辣辣,好啱食!



近期急不及待咁食左幾次雞鍋,當中以呢個最啱我口味!我叫左微辣,已經夠晒惹味!個汁好濃,用鐵鍋上,熱力將所有香料同雞塊既香味逼晒出黎,雞件夠滑,讚!


  







之後就到火鍋同配料啦,大家都見到分量係幾勁!二人分量,我覺得四個人都夠食。響眾多美食之中,我特別推介大蜆,爽口鮮甜;另外必食係牛肉,脂肪分布平均,牛肉味濃;墨魚滑非常彈牙,水準之作。


當食到捧住個肚,諗住埋單之際,原來仲有燕窩焗蛋白做甜品,好在我有第二個胃啫!蛋白有少少椰汁味,夠香滑,而且分量唔會過量,都算考慮周到!

二百幾蚊有咁多野食,夫復何求吖!最重要係,如果你食得落,以上大部分都可以無限添加,可恨我唔係牛,無四個胃,所以食一round就要收檔!



2016年10月27日 星期四

希臘風平價高質餐廳

自從公司由尖沙咀搬到去觀塘,黎呢度食晏既機會多左,梗係要搵多D上樓好味餐廳黎試。今日食既係米克‧諾斯 (Kallisti)。聽個名完全搲頭,究竟食咩?





餐廳位於觀塘工業區某商廈四樓,雖然位置隱閉,但估唔到竟然係座無虛設 (甚至直到我食完飯兩點幾,都一直有人入座)。

餐廳裝修採用希臘風,全藍白色設計,俾我地D上班族中午黎透一透氣,實屬一流。

中午餐牌設有七個選擇,全部都係西餐,包前菜/餐湯、主菜、飲品,價錢由$58至$98,唔收加一,單睇價錢係幾抵食。



煙三文魚沙律

沙律主要係沙律菜,上面鋪左幾塊煙三文魚,味道清淡;旁邊係一壼香草沙律汁,落幾多悉隨尊便,夠晒闊綽!



番茄香草蟹肉湯

湯內明顯有一絲絲蟹肉,湯底酸中帶微辣,仲有紅蘿蔔、番茄、青豆等配料,雖然唔係忌廉湯,但一樣感覺好rich,正!




檸檬番茄醬燉西班牙黑毛豬 (烤餅/飯,$78)

響我心目中既黑毛豬,應該係一片片既,估唔到呢度係一方塊一方塊既,燉得好腍身,加埋鬼佬臘腸、番茄汁,好送飯!

值得一提既係,我本身係叫烤餅既,但上枱時俾錯左飯,於是餐廳飯照俾,烤餅再另加;之後我睇番餐牌,原來響呢度食套餐,白飯係免費任加架!真係震驚,咁大胃王黎到都無有怕啦!




香芒帆立貝漢堡窩夫配香料薯條 ($68)

呢個真係必食推介!估唔到響觀塘lunch都可以食waffle咁幸福,而且個waffle係加左蜜糖黎烤,又脆又甜又有蛋香,好食到想喊!兩塊Waffle之間係四塊帆立貝 (應該係由兩粒剖開而成,比較薄身),仲有芒果、洋蔥、蕃茄等等,好清新既味道!

唔好忘記旁邊既薯條,炸得好脆,並灑上調味粉,感覺係好味版既shake shake薯條!連細微處都無馬虎對待,實在值得一讚!下次再黎,我都係想再encore呢個!