原隻鮮雞燉花膠湯底，無懈可擊！

秋天已經悄悄降臨，一早一晚都有D涼意，響呢個咁浪漫既時刻……就梗係去食火鍋啦！

旺角有一間叫「鮮入圍煮」既火鍋店，係食評網既得獎熱店，既然地點咁就腳，一於約朋友去試！

我去既時間係周二晚，但一直保持全場爆滿，可想而知餐廳既受歡迎程度！餐廳採用懷舊裝修，牆壁唔係真係黑麻麻咁污糟，而係扮污糟既牆紙黎！上面貼滿仿70年代既街招，吊燈又用左懷舊雞蛋燈，好得意！

原隻鮮雞燉花膠湯底 (細，$238)

呢度最出名係鮮雞燉花膠湯底，唔好執輸叫番煲！一上枱，仲以為佢俾錯粟米湯，因為成煲湯都係黃色既！但原來唔係囉，人地係將D湯煲到好濃，濃到成煲都黃色。呷一口，嘩，真係好得！滿嘴都係鮮雞精華，嗒落仲有餘韻！而且花膠分量好足，食極都仲有，食完真係 (自覺) 靚女左！

我建議大家可以「齋啪」第一煲雞湯，食肉飲湯，飲到滿足晒啦，就請侍應加湯 (第一次加湯仍然係雞湯，第二次再加就係普通清湯)，加湯後先再打邊爐都唔遲。

醬料 (每位$10)

皇帝菜 ($32)、炸響鈴 ($48)、花膠墨魚丸 ($88)

嫌個鮮雞花膠湯唔夠喉，可以點埋花膠墨魚丸，咬開入面都係花膠，真材實料！呢碟丸分量都幾勁，粒粒好似乒乓波咁大，$88唔係貴。

手切安格斯牛肉 ($158)

打邊爐又點可以無牛肉？呢度既安格斯牛肉亦係必點名物。有牛肉味，牛肉上有油花，脂肪比例適中，食落有油香，牛肉迷一定要試。

花甲王 ($58)

海鮮檔有唔同海鮮挑選，揀啱後「檔主」會報價。我地呢晚點左花甲王，又係好吃得流淚！花甲好新鮮，肉質軟嫰鮮味，同個雞湯勁夾，可惜肚仔好飽啦，否則真係好想叫多碟。