視覺與味覺的藝術

食日式鐵板燒，除左美味既食物可以滿足到味蕾，師傅爐火純青既手藝，亦同樣令人嘆為觀止！

最近去左尖沙咀既「心鐵板燒」，呢度有個「鐵板燒特選二人套餐」 ($1,680/ 二人) 都幾抵食，以下逐一介紹：

明太子海藻沙律

先黎沙律，老闆絕對唔孤寒，好大pat明太子，鹹鹹辣辣既味道，配埋黑醋雜菜沙律，唔錯；食食下，發現入面有D好似粉絲、但咬一下就會卜一聲爆開既野，一問之下，原來佢係海藻黎架，開心大發現！

龍蝦湯

由餐湯開始，師傅開始響鐵板上表演啦！我叫既係龍蝦湯，師傅先將龍蝦響鐵板上燒到僅僅熟，然後再倒入已在鐵板上煮好既湯底，最後響面頭加上奶油，就係咁，一碗香濃味美既龍蝦湯就誕生左啦！

意大利多士

番茄莎莎醬，新鮮番茄酸咪咪，相當醒神，夾埋龍蝦湯飲very good！

南非大鮑魚配正油牛油

餐廳採用南非大鮑魚，大隻厚肉。師傅先響鐵板上鋪上一層厚鹽，灑上少量水份，然後再放連殼鮑魚上去，冚蓋焗，據師傅講，咁樣係要形成蒸爐效應，可以逼走鮑魚本身既海水鹹味，令鮑魚鮮味更突出，而家好少餐廳會咁做，因為每整一次都會犧牲好多鹽，提高左成本。

將鮑魚焗一陣之後，師傅用自家製正油牛油 (正油即醬油，師傅用正油同牛油融合成為獨家調味)，將鮑魚再炒一炒，D香味炒到出晒黎，口水都流埋！

一啖放入口，火候同味道都控制得剛剛好，鮑魚爽口，帶有鮮味，加上正油牛油既香氣，相當惹味！

火焰清酒煮蜆

師傅先在煲內加入清酒、點火，熊熊烈焰相當壯觀，之後佢將大蜆放入去煮，每一隻剛打開，佢就即刻夾起，確保每隻蜆都係咁鮮嫰。湯底加入左昆布同辣椒，味道偏辣，非常刺激！

季節野菜

今晚係茄子、翠肉瓜、紅椒，只用鹽去調味，能食出新鮮蔬果既天然味道。

美國肉眼厚燒

牛舌心

和牛和尚頭

和牛三食。美國肉眼肉味夠濃，可以先食原味，之後再點岩鹽或wasabi食；牛舌心好爽口，加埋伴碟既蒜片夠香口；和尚頭即大脾位，油香同肉味都重，非常出色！

升級小女子炒飯

Last but not least，呢個炒飯真係俾左好大驚喜我！小女子者，白飯魚魚乾也，師傅加埋薑蓉、洋蔥、蘿蔔漬、蔥花、雞蛋去炒飯，炒得粒粒分明，魚乾甜甜地帶鮮味，再加埋薑蓉既少少辣味，非常好！如果唔係已經好飽，我真係想encore多碗！

炒雜菜

主要都係D芽菜同椰菜咁，味道比較清淡，送飯佳品。

柚子雪糕伴香蕉法式吐司

最後就到甜品。我揀左柚子味雪糕，旁邊係香蕉多士 (師傅用牛油煎過)，甜而不膩，兩者好夾，為今晚既鐵板晚宴畫上完美句號！

紫蘇芝士天婦羅，無得彈！

尖沙咀亞士厘道有一幢無名既大廈，只係得門牌17-19號，呢度隱藏左唔少好餐廳，「鮨真」係其中之一。

食廚師發辦Omakase既朋友，可以坐到吧枱前，邊欣賞夜景，邊欣賞師傅們既一流手藝，雙重享受。

人人都介紹呢度既壽司刺身，今日我就講下呢度既熟食，俾大家多個選擇！

磯粒貝 (前菜)

前菜係磯粒貝，實實在在既海螺鮮甜味，而且煮得入味，食左返唔到轉頭食本地東風螺！

蛤鹽燒 ($120)

即是燒蜆。火候控制得好好，蜆殼上仍保留住湯汁，有少少酒味；蜆肉鮮嫰唔靭，好新鮮既味道，唯一「缺點」，就係得兩隻好唔夠喉！

小蕪菁 ($120)

即是日本BB蘿蔔，配以鮮蝦、金菇、冬菇、紅蘿蔔、大蔥等煮成，清淡既調味，反而食到蔬菜既天然味道，蕪菁煮得又腍又入味，係簡單而味美既一道菜。

雜錦天婦羅 ($120)

共有五款：鮮蝦、南瓜、番薯、辣椒、紫蘇芝士，侍應建議由蝦食起，最後先食芝士，以免被熱辣辣既流心芝士淥親！鮮蝦甜美而實肉，食得出新鮮；好鍾意番薯，一定係日本番薯，幸福既甜味；而必食既就係紫蘇芝士，我本身好喜歡紫蘇葉既獨特香氣，用佢包住北海道軟芝士黎炸，鹹香而唔羶，十級美味！

順帶一提，呢度既天婦羅並唔係配天婦羅汁，而係點鹽，食蝦時尤其能帶出海鮮既甜味！

牛肉烏冬 ($50)

仲未飽，叫多碗牛肉烏冬。上枱時牛肉仲係半熟狀態，確保唔會過熟而變靭；牛肉好靚，脂肪分佈平均，加埋切得細碎既香蔥，另一水準之作。

鮮魚清湯 ($50)

平時我好少飲魚湯，怕腥，但呢個清湯就做得相當好，湯底已熬成奶白色，魚肉仍然保持實淨，魚湯有鮮甜味 (阿媽煲都好少飲到甜味)，立時一飲而盡！

開心果雪糕

好香開心果味，內藏粒粒果仁碎之餘，仲帶有果仁焦香，非常完美！

火焰鹹豬手，極度吸睛！

自從公司搬左去觀塘之後，經常發掘身邊有咩好餐廳，「中海日升中心」就有唔少新餐廳，自然成為我既覓食目標！

去中海日升「搵食」既好處，係夜晚人流唔多，唔需要大排長龍之餘，更有好多優惠，好似我呢晚去既「Feburary」咁，Weekdays夜晚光顧有八折 (仲要係加一後先折)，慳左既錢可以食多個甜品！

February擁有一個大大既吧枱，大家夜晚想黎嗒番幾杯都可以。

牛肝菌忌廉湯 (+$38 跟餐)

打開餐牌，晚餐選擇頗多，加多$38，可以轉餐要埋餐湯同餐飲。呢晚餐湯係牛肝菌忌廉湯，一上枱已聞到香味，飲一啖，真係好香，而且個湯唔會好creamy，又清又香既感覺唔錯，好快就俾我飲晒。

德國腸拼盤 ($132)

朋友鍾意食香腸，於是叫左個拼盤。一共有四款腸，各有不同個性：牛仔腸比較腍身，法蘭克福腸腸衣脆口，芝士腸會爆汁，昆布蘭腸結實有香草，各有優點。

德國火焰鹹豬手 ($282)

我地呢D呃like怪，見到餐牌有火焰鹹豬手，即刻點黎睇下。豬手上枱後，侍應會淋酒再加火燒，令到已經燒得脆口既豬皮變得更脆，咬落去先係脆卜卜，再係脂肪既黏口，口感豐富；唔好忘記旁邊既薯蓉，應該加左芥辣去做，酸酸既味道，仲食到薯仔塊，開胃又特別！

特濃心太軟 ($62)

發現晚飯有八折之後，我地決定叫多個心太軟 (可以揀朱古力或抹茶味)，一切開，朱古力漿即時流出，好濃重既朱古力味，暖笠笠，啱晒今晚著唔夠衫既我，食完暖身又暖胃！

午市必食$1/隻蝦餃

好多人夜晚會去旺角既「鍋心」打邊爐，但其實呢度早、午市同下午茶都有茶飲，點心質素唔錯，而且唔同時段都有唔同點心做緊特價，各位每逢周末都會同家人飲茶既朋友，可以考慮下。

即焗雪山叉燒飽 ($18)

每日逢中午12點推出，即叫即焗，我今日黎到時間啱啱好，當然要叫一客。上枱新鮮熱辣，雪山皮鬆脆，麵包軟綿綿，更難得既係叉燒無肥膏 (最憎食叉燒包有肥膏，難食又唔健康)，非常好；唯一缺點係包底稍為油膩，如可改善一下更佳。

金網鮮蝦紅米腸 ($23)

紅色既腸粉皮，原來係由紅米所造，造型頗嚇人，不過味道確唔差：腸粉皮軟綿，入面係一層脆卜卜既金網包住實肉既鮮蝦，好食！

鍋心水晶蝦餃 (特價$1/隻)

呢度既點心好多都係逐粒計錢 (但要兩粒起)，夠晒Flexible，蝦餃本身係$8/隻，午時就$1/隻 (每人只限一隻)，黎到當然必點！蝦餃水準唔錯，蝦肉新鮮彈牙，而且唔會加好多筍絲等配料，真材實料！

巧手潮州蒸粉果 ($16)

桂林辣椒醬

晶瑩剔透，材料又多，花生、韭菜好香口，加埋好耐無食過既桂林辣醬食，確係一流！

原粒蟹籽燒賣 ($7/隻)

 熱辣辣，食唔出肥膏，又係另一美味之選。

魚湯鮮竹卷 ($17)

魚湯味道頗濃，鮮竹卷浸響入面，唔會乾爭爭，腐竹皮軟腍，入面既豬肉芹菜等亦美味，整體感覺良好。

臘味糯米飯 ($25)

糯米飯煮到軟綿綿，材料又豐富，好多臘腸，冬天食啱晒！

薑汁雙皮奶 ($20)

非常watery，而且好「夠薑」，鍾意食雙皮奶既朋友必點。

泰式椰汁西米糕、泰式千層糕 (各$18)

估唔到呢度除左中式點心，仲有我最鍾意既泰式甜品，一口氣叫左兩款，都做得唔錯，椰汁味濃，千層糕夠煙靭，西米糕夠甜美，下次要試埋椰汁糯米飯先得！