清風街小清新之選

天后清風街向來係卧虎藏龍之地，最近又有一間新餐廳加入戰團，佢叫做「JL C. Kitchen」。

餐廳光猛寬敞，裝修擺設以至窗上既手繪圖畫，都顯示餐廳走小清新路線，啱晒成班女仔黎食飯談心。

水果鮮打茶 (蘋果蜜桃，$38)

呢度提供唔少台式鮮果茶，我朋友飲呢杯水果鮮打茶，飲到粒粒新鮮蘋果同蜜桃，味道唔錯，但朋友略嫌多渣。

水果花茶 ($50)

我呢壼水果花茶就無投訴啦，中間有玫瑰花，壼內則有多種水果，包括：士多啤梨、藍莓、奇異果、蘋果、荔枝，既有花既香味，又有水果既甜味，用蠟燭暖住，飲落暖笠笠，唔錯！

Australian Rib Eye (晚餐，$198)

牛排五成熟，面頭燒得微焦，內裡仍保持鮮嫰；伴碟既配菜亦唔馬虎，薯條炸得好脆，一口番薯夠甜，好食。

牛油果蟹肉七吋薄餅 ($108)

牛油果同蟹肉都係我既「飛佛」，加埋酸酸甜甜既沙律汁，唔駛講已經啱晒口味！薄餅係薄批，夠香脆。

黑椒蜜糖焗雞翼 ($68)

唔係太食到黑椒味，同期望有D唔同，不過雞翼肉質夠嫰，搶番一D分數。

香蕉焦糖窩夫 ($68)

女仔食飯點少得甜品？我地揀左呢款窩夫，好有蛋香，窩夫面頭香脆，香蕉都加左焦糖去焗，既香且脆，夾埋雲呢拿雪糕食，perfect！

高質+驚喜的Omakase (多相+有片)

愛吃Omakase，因為往往充滿驚喜！呢晚去既「福村日本料理」位於中港城平台層，餐廳食物美觀、煮法特別，邊食邊驚喜連連，令我忍唔住係咁影相、影相同拍片！

傳統日式料理餐廳裝修，光猛舒適。我地被安排坐到壽司枱，可以邊食邊欣賞大廚們既手藝，一個價錢兩種享受，正！

我地今晚揀既係$1,300/位既Omakase，一齊睇下有咩食：

無花果沙律

我個人好喜歡食新鮮無花果，一見呢個沙律即眉開眼笑！無花果好清甜，面頭既係炸番薯絲，脆卜卜，下面係海帶、雜菜、蟹子等等，配以醋汁，成個沙律既感覺都好清新，第一印象非常良好！

酸髮菜 + 火腿 + 鮟鱇魚肝

髮菜爽口且酸咪咪，有薑汁味，係好好既開胃菜；火腿鹹香；魚肝香滑豐盈，有魚鮮味。

各式刺身

頂級拖羅，有油花，十分肥美； 牡丹蝦鮮甜，之後大廚拎左去炸，一蝦兩食，各有風味；北海道海膽新鮮甜美，外層用魚生包住食，非常精緻！

金箔毛蟹

面層係食用金箔同蟹膏，上枱時蟹膏仍然暖笠笠，有蟹膏既鮮味之餘，亦帶有紫蘇葉既獨有香氣，非常好！之下係啖啖毛蟹肉，蟹味香濃，不愧係食蟹季節！食時可以點少少土佐醋 (一般用木魚水、味醂、薑、醋等煮成)，有提鮮既作用。

焗釀鱈場蟹腳

相比起毛蟹，鱈場蟹腳比較淡味；蟹蓋內係蟹肉、蟹膏、薯仔等等，用芝士去焗，好香，用匙羮一啖啖畢黎食，非常滿足！

鹽燒油甘魚魚鮫

魚肉唔算滑，但好有魚味，大廚將魚皮煎得香脆，擠少少青檸汁食更好味。

芝麻汁蒸無花果

從來未食過蒸熟左既無花果，估唔到一樣咁甜美清新，加埋日式芝麻醬，更係天衣無縫！拍案叫絕之際，請來經理一問，原來呢道菜式係餐廳創辦人西川先生既得意之作，果然出色！

各式壽司及手卷

單睇賣相已經滿分！叫我驚喜既係用生菜包住既三文魚壽司，造型碧綠美觀，三文魚經火槍燒過，有微微焦香，面頭仲有脆卜卜既炸番薯絲，多重口感；另一個驚喜係白子壽司，白子即是魚的精巢，秋冬季節最肥美，面層少許爽脆，入面柔滑豐腴，暖笠笠，就好似滑蛋咁，只要你敢食，就一定要試，好好食！

素麵

用木魚、昆布等淆成湯底，內有昆布絲同大量蔥花，看似簡單既一碗麵，食落就知唔簡單！

甜品

甜美完熟既蜜瓜，冰冰涼涼，為今晚既精彩Omakase畫上完美既句號！

新鮮抵食海鮮拼盤 + 高質邊爐 (多相)

之前已經去過四季文昌，對佢既椰子雞湯底邊爐同龍蝦煲仔飯念念不忘，一直心思思想再黎多次，而家新開左尖沙咀店，更加就腳，天氣又開始轉涼，無理由唔黎啦！

相比起旺角店，尖沙咀店比較細，但一樣咁stylish，全部都係大梳化，新淨又舒服，最啱約埋大班朋友黎食。

法國蟹海鮮拼盤 ($598)

打開餐牌，竟然發現有海鮮盤，可以揀阿拉斯加蟹 (半隻$1,088，一隻$1,888)、波士頓龍蝦 ($598) 或法國蟹 ($598)，最鍾意食蟹膏，我既不二選擇一定係法國麵包蟹！

呢個餐認真抵食！有法國蟹1隻、生蠔12隻(!!!)、蝦6隻，翡翠螺6隻、青口6隻，配白酒一支，分量足4至6人食，每人除開先百零蚊。

生蠔有12隻，其中兩隻仲係巨無霸，有成隻手掌咁大！生蠔非常新鮮，海水味重，爽口唔腥，水準之作！

麵包蟹唔駛講都係多膏，啖啖鮮味，肉質亦鮮甜！呢排咁多有毒大閘蟹，鍾意食蟹膏既朋友，轉食來路膏蟹更加安全放心。

鮮蝦好鮮甜，而且爽口彈牙，阿妹食到「蝦駁蝦」唔停得口！

單食海鮮盤已經好滿足，但講到底，我係為左椰子雞鍋黎架嘛，又點可以錯過？

侍應先送上醬汁配料，同出面既餐廳好唔同，呢度只係提供沙薑、辣椒、海南野生青金桔三味。青金桔屬海南特產，有開胃生津之效外，據講仲可以提升雞肉既鮮味，大家黎到記得嗒真D。

原味椰子雞 ($128)

終於，我最愛既椰子雞鍋上枱啦！侍應將成樽椰子/ 椰皇水倒入鍋中，可以想像湯底係幾甜美！除左食雞，我仲食晒D椰肉，又清甜又軟嫰，真係好正！

餐廳好細心，將海南文昌雞倒入鍋後，會以沙漏計時，咁就唔怕雞件會煮得過老；另一細心之處，係侍應之後會幫大家將鍋內既雞油撇走，咁大家就可以更健康地享用椰子雞湯啦！

再一次嘗到呢啖椰子雞湯，依舊係咁清甜兼有雞味，好味過媽媽煲既老火湯，真係勁正！我建議大家齋啪第一鍋雞湯，之後先再加湯去打邊爐，咁就very good啦！

日本直送野菜籃 ($49)

手打蝦滑 ($68)

意大利黑松露墨魚丸 ($98)

炸響鈴 ($25)

紐西蘭雪花肥牛 ($68)

火鍋料大家各取所需啦，不得不提個手打蝦滑，入面有大粒大粒蝦肉，真材實料；黑松露墨丸夠矜貴，有淡淡既松露香味；響鈴屬鮮炸，上枱時仲熱辣辣脆卜卜，非街市來貨可比。其他如菜藍同肥牛，睇相都知新鮮靚料，唔多作介紹啦！

呢一餐食到捧住個肚走，又海鮮盤又高質邊爐，每人除番開先二百蚊左右，個人覺得好抵食，期待再下一次的相遇！