浪漫滿屋 -- 心之食堂

想浪漫，唔一定要一男一女既，三個女仔傾下心事、講下秘密，都一樣可以好浪漫！呢晚我地去左銅鑼灣既「心之食堂」，有浪漫既紫色特飲，有心形既大阪燒，見到已開心到暈！

藍蝶花白桃乳酸 ($48)

近年好興用藍蝶花黎做食用色素，「心之食堂」都採用左呢種浪漫既顏色，加入乳酸飲品之內。藍蝶花本身無乜味道，反而乳酸味夠突出，酸酸甜甜夠開胃。

蒜片牛柳粒 ($78)

好香既甜椒味道，牛柳又腍又入味，無渣，一啖一粒，必點！

石板黑松露牛油帶子 ($68)

用鐵鍋上枱，熱辣辣，冬天食最啱。帶子肥美有膏，黑松露夠香，惟帶子本身唔算太鮮甜，美中不足。

味醂魚乾 ($88)

味醂非常入味，燒得又香又腍，非常惹味，這個本來想encore，但後來因為太飽先作罷。

胡椒豬骨湯煮蜆 ($68)

蜆夠新鮮，但湯底唔夠香辣，同期望有少少唔同，不過都係唔錯既選擇。

蟹肉忌廉餅 ($33)

外層炸得脆卜卜，入面忌廉餡軟滑，不過蟹肉唔多，可以再加改良。

嘩蝦哈蝦 ($68)

鮮蝦新鮮爽口，造型又靚，用黎呃like一流！

香蔥石板牛舌 ($58)

同樣用鐵板上，上枱時汁醬仍起泡！牛舌夠厚，既腍帶爽，抵食。

明太子醬炸大蝦併銀鱈魚 ($98)

炸蝦夠脆，明太子醬辣辣地夠醒神；銀鱈魚夠厚，啖啖肉，有魚香。

心動大阪燒 ($68)

心形既大阪燒，一望心動，咁不如快快行動！大阪燒比較實淨，好飽肚，入面主要係火腿同椰菜，底部係煎得香脆既麵條，醬汁酸酸甜甜，唔錯。

心之靈感壽司 ($198)

海膽壽司非常出色，軟滑香甜，而且輕輕燒過，有焦香，必食！另外燒拖羅亦相當唔錯，有魚油，帶魚香，半生熟既狀態，味道剛好！

港版磯丸水產

去東京玩，我好鍾意食「磯丸水產」，皆因海鮮生猛又好氣氛，而且價錢絕對affordable，一直想響香港搵間類似既，最近終於俾我搵到位於諾士佛臺既「秋田浜燒食堂」。

餐廳地方好大，有齊室外同室內座位，坐得輕鬆闊落。全部燒烤都有專人代勞，唔怕自己唔識控制火候，燒得過生或過熟，嘥左D靚海鮮。

溫室野菜串拼盤 ($68)

正式食海鮮前，先黎一個野菜拼盤，食下蔬菜先。拼盤有南瓜、大蔥、番薯、冬菇、辣椒仔，我最鍾意食甜甜既番薯同南瓜，其他蔬菜都好新鮮，感覺唔錯。

一手赤蝦 (遊戲獎品，免費)

因為餐廳係新張期，所以只要食客Like & Share餐廳既Facebook Page，就可以玩「一手赤蝦」遊戲，即是你一手拎到幾多隻蝦，餐聽就會送俾你食。

咁著數？即刻參加！我手大，一下就抓到九隻！D蝦可以燒，又可以做刺身。我個人建議做刺身好D，又大又鮮甜兼已去腸，反而經BBQ後，蝦肉比較鬆散，雖然都甜，但感覺無咁好。

北海漁港套餐 ($398，兩位起)

接著終於到戲肉：海鮮拼盤！每位$398，食材新鮮又豐富，除海鮮以外，仲有刺身、湯、飯麵、水果等等，一齊睇下有咩食！

華美燻雞刺身沙律

刺身試唔少，但雞肉都係第一次試。煙煙靭靭既質感，加上wasabi同醋汁等調味，感覺唔差，大概只有日本雞肉先可以咁生食吧！

清酒昆布大蜆煮

蜆肉好大隻，煮得僅僅熟，夠嫰滑，好味道；個湯底偏甜，可以中和番大蜆既海水鹹味。

兵庫縣活播磨牡蠣 + 大阪爆汁辛辣腸

牡蠣，即是我地講既生蠔，師傅用爐烤之餘，更用上火槍響上面燒，保證底面同時燒得剛好。蠔肉大粒creamy又多汁，水準唔錯！辛辣腸顧名思義係辣辣地既，都幾juicy，唔怪得個名叫「爆汁」。

北海道帆立貝

帆立貝大大隻，烤到半熟後，師傅會將佢地拎入廚房清除肉藏同沙囊，之後再拎番出黎，加入sake、堅魚豉油、牛油去燒，帆立貝被切成一細粒一細粒，裙邊又分開晒，整整齊齊，相當易食。帆立貝鮮味，有牛油香，好食。

青森殘酷網鮑

到我既「飛佛」南非九孔鮑。經火一燒，鮑魚即生猛舞動 (有片)，咁新鮮，唔駛講都知鮮味兼爽口啦！

蟹味噌甲羅燒

的確響東京既「磯丸水產」食過，而呢度既更勝一籌。除左新鮮蟹膏，更加入蟹肉、蔥花、蟹子、鵪鶉蛋等，攪拌燒熟，味道剛好，有蟹鮮味，咬落蟹子卜卜聲，加到花形脆餅上面食，非常好！

九州松葉蟹

呢個激讚！蟹肉非常鮮甜！一般食日本蟹，好多時只有腳甜，個身唔甜，但呢度就兩者都咁鮮甜，而且餐廳好細心，將蟹腳都去左一邊殼，只要用蟹叉一搯，即刻食到啖啖蟹肉。

山之惠黑松露茸野菌鋁箔燒

之後就係野菌，新鮮菇味，有牛油香。

鯛汁野菜烏冬

味噌烤飯糰 (明太子)

主食可以三揀二 (除以上兩樣，第三個選擇為茶漬飯)，兩者中以烏冬較佳，魚湯既魚味相當突出，相信加入左唔少鮮魚煞製！

日本果物

番薯雪葩 ($78)

食埋生果都未夠喉，encore左個番薯雪葩，雪糕香滑，番薯仍保持凍冰冰、硬硬地，叫一個甜品有兩種享受，抵呀！

女孩子天堂 -- The Pantry

假日久唔久就會到Elements行下，地方大，人又唔多，行街食飯都舒暢。呢日去到二樓HMV旁邊既The Pantry，睇下有咩好野食。

餐廳環境光猛，放置左好多綠色植物，令人頓覺心曠神怡。

Kale and Quinoa Salad ($118)

先黎個羽衣甘藍藜麥沙律，需知道，呢兩種食物都係Super Food，前者低卡、不含膽固醇，而且含豐富膳食纖維，後者帶氨基酸，容易消化，係大米既最佳替代品。除左呢兩種超級食物，沙律內仲有粟米、士多啤梨、南瓜籽、葵花籽、番茄仔等等，加左少少檸檬羅勒汁調味，酸咪咪，都幾飽肚，素食人士唔好錯過！

Scallop Carpaccio ($95)

新鮮帶子刺身被切成薄片，加入wasabi橄欖油，少少刺激但絕唔攻鼻，面頭仲灑上芝士粉，西日合璧，係鮮甜美味既配搭。

Waffle Benedicts ($138)

女仔梗鍾意食waffle，所以主食我揀左waffle benedict。荷蘭汁之下係水煮雞蛋，一切開，蛋漿即如江河缺堤；雖然已被我放左一陣，但waffle仍然保持卜卜脆，加埋非常新鮮、熟度剛好既牛油果，以及鹹鹹地既火腿，好味道！

The Pantry's Pancakes ($120)

最後當然唔少得呢度既signature甜品 -- Pancake！The Pantry既Pancake等同出面既Souffle Pancake，厚身又鬆軟，女仔見到立即瘋狂！旁邊係Honeycomb butter，甜甜既味道，基本上唔需要加任何糖漿，都已經非常好味；伴碟既雜莓新鮮甜美，一樣唔可以錯過。成碟有成三大件，絕對唔野少，記得留肚食！