2016年11月11日 星期五

元朗心機西班牙餐廳

元朗鳳攸南街有好多靚餐廳,今日朋友帶我試一間叫Granada既西班牙菜,我覺得餐廳都幾有heart,可以介紹一下。




餐廳呈長條形,比較狹小,不過有梳化位,都算坐得舒適。




蒜油蝦 ($118),法包 ($20)

食西班牙菜,點可以唔試Tapas?蒜油蝦,very good!鮮蝦爽口彈牙,夠新鮮,旁邊既蒜頭已經煮腍,非常惹味;連橄欖油都充滿蒜味,唔好嘥,一於叫碟法包黎點埋佢,好脆口,好好食。



鵝肝法包多士 ($78/件)

接著係我既最愛 -- 鵝肝。雖然要$79/件唔算平,但一分錢一分貨,鵝肝好大塊好厚身,夠creamy,味道濃,面頭係一片經紅酒同糖煮過既士多啤梨,酸酸甜甜,中和番鵝肝既滯膩感,不負期望。



西班牙芝士番茄沙律

我地一行三人,於是再叫多個二人餐 ($598),先黎沙律,入面係一粒一粒「厚切」芝士,用既係Manchego芝士,被視為西班牙國寶,用羊奶製成,脂肪含量較牛奶低,含有豐富不飽和脂肪酸,有益又容易吸收。雖然係羊奶 (而我最怕就係羊同奶),但出奇地,Manchego芝士係唔羶既,食落比較硬身,芝士怪必試。



燒加利西亞八爪魚

八爪魚燒得香,而且估唔到咁腍身,用微辣既醬汁調味,夠惹味;唔好忘記伴碟既薯蓉,咬落有粒粒薯仔,絕對唔係開粉既貨色,細微處都唔馬虎,抵讚!




燒西班牙伊比利豬鞍架

豬鞍好厚肉,經過slow cook後,肉質粉嫰腍身;面頭係白松露醬,味道比黑松露淡,唔會搶走豬肉既鮮味。呢一碟既分量都頗大,抵食。



墨魚汁闊條麵 ($138)

墨魚有淡淡既鮮甜味,厚肉彈牙;每條闊條麵都沾滿墨魚汁,唔錯!



朱古力布丁 (跟二人餐加$10)

布丁細滑,但朱古力味較淡,好彩面頭有厚厚既一層Oreo碎,夾住食味道都唔錯。


沒有留言:

張貼留言

注意:只有此網誌的成員可以留言。