以為咁神秘就無人識上黎？錯勒，我周六晚上黎到，竟然坐滿八成，原來呢個世界係有咁多識途老馬既！今晚試左佢地既「正葵」套餐，12種加卷物 ($800，另加一)，好唔好味？而家報告一下。
豆腐沙律
因為人多，師傅實在忙得不可開交，於是侍應先奉上豆腐沙律俾我地醫肚。豆腐好有豆味，質感滑溜，加埋旁邊既配菜食，夠晒fresh！
先付
即是前菜，有醃蘿蔔、蕎頭、牛蒡、蒜頭，最喜歡係牛蒡，有淡淡既藥材味，而且佢仲有抗氧化、抗癌等功效，想靚想健康，記得食多兩條。
合肴
即煮物，今日提供既係磯煮鮑魚，鮑魚味突出，而且因為係連埋內藏去煮，所以帶有一種甘苦味道，同行友人非常喜歡！
刺身
赤貝、深海池魚、金線鯛、吞拿魚、三文魚、帶子、伊佐木 (即12種的其中七種)，秋冬食刺身最啱，魚生鮮味有油香，貝類鮮甜爽口，好吃。
壽司 + 卷物
接住既壽司同卷物，就係12種餘下既五種。最喜歡一定係海膽壽司，北海道海膽非常鮮甜，而且分量足，海膽仲多個飯，正！另一推介係火炙帶子壽司，帶子厚肉，有火炙過既香味，唔錯。
玉子燒
甜美有蛋香，一啖一粒好幸福！
吸物
即是湯，今晚係大蜆麵豉湯，味道偏鹹，不過大蜆非常鮮甜，火候控制得好，唔過靭。
菓物
甘味
甜品可以揀水果或雪糕，咁一於每人一款試下，結果係水果完勝！雪糕係柚子味，帶微酸，感覺清新，雖則如此，但都唔夠已經完熟既日本蜜瓜完美！蜜瓜切好晒一粒粒，一叉就食得，而且又熟又甜，雪到凍冰冰，真係好想食晒成個！
沒有留言:
張貼留言
注意：只有此網誌的成員可以留言。