新奇有趣的天婦羅選擇

天后美食多，最近又增添一名新成員，名叫「天日本料理」，呢度既Omakase由$800起跳，朋友想試下，我一於奉陪到底！

餐廳唔算好大，但光猛舒適；吧枱呈L形，食客可以觀賞師傅既手藝。我食Omakase係有D麻煩，因為我魚生唔太接受到，但貝類可以，有D餐廳聽到就會皺眉甚至不悅，但呢度既職員就願意細心聆聽，然後幫我安排合適既食物，值得一讚！

前菜

先黎前菜，有泡菜、海螺、鹹魚仔，最喜歡係海螺，鮮味帶少少甜，唔錯。

帶子刺身

青柳貝刺身

赤貝刺身

餐廳為我安排左三款貝類刺身：帶子鮮甜，比一般食到既更彈牙，只用岩鹽同青檸調味，味道已相當突出；青柳貝同赤貝，上枱前都被師傅拍打過，刺激神經後更加爽口，前者較腍身甜美，後者則比較清爽，各有性格。

大蜆海帶湯

食完冷冰冰既刺身，係時候飲碗熱湯，以進入後面既熱葷。蜆湯味道清淡，反能凸顯蜆既甜味，飲完暖笠笠，好舒服。

鹽燒真鯛魚魚頭

魚皮燒到卜卜脆，好香口；裡面既魚肉魚味濃，魚油足，加少少檸檬汁提味，感覺已經相當唔錯。

天婦羅 -- 鮮蝦

天婦羅 -- 蟹腳

天婦羅 --  公魚

天婦羅 -- 沖繩苦瓜

跟住黎既幾款天婦羅，除鮮蝦以外，其他一般較少用黎做tempura，所以令我相當驚喜！

鮮蝦非常鮮甜，點少少鹽食鮮味更突出，蝦頭炸得好脆，輕輕一咬已四分五裂，好食；蟹腳同樣鮮美，已經去殼，食時啖啖肉非常方便；日本公魚既感覺有少少似多春魚，細細條，入面有魚春，食到魚頭更加甘香；苦瓜黎自沖繩，同我地食開既本地苦瓜唔同，沖繩既更加結實爽口，甘而不苦，希望食完可以幫我清少少熱啦！

蝦餅飯

呢塊蝦餅材料非常豐富，除鮮蝦以外，仲有洋蔥、番薯、南瓜、紫蘇葉等等，面頭仲加上一隻半生熟雞蛋。我鍾意食番薯同南瓜，甜甜既味道非常誘人，再加上紫蘇獨特既香氣，相當唔錯，如果可以減低飯底既油膩感，將可以再加分數。

開心果雪糕

最後係甜品 -- 雪糕。呢個開心果雪糕奶味較重，充滿果仁碎，真材實料！

打邊爐都可以一秒變美人？

邊爐打得多，但台式真係未試過。最近留意到尖沙咀金馬倫道既「老鍋台式火鍋」都幾Hit，於是呢晚特登黎試下。

餐廳位於商廈四樓，地方幾大，要坐室內定室外，悉隨尊便。

食火鍋好多人鍾意加調味，呢度都有個調味料corner，不過後來我發覺，呢度既湯底實在好好味，打完邊爐既食物都非常入味，其實絕對唔需要加入任何調味。

杞子菊花圓肉露 ($78/壺)

未黎食物，不如先黎一杯吧。怕打邊爐熱氣，我推介呢款杞子菊花圓肉露，清肝明目，圓肉味突出，甜甜既味道非常好。

美人鍋 ($198)

睇食評好多人推薦呢款美人鍋，於是都叫黎一鍋，果然無介紹錯！好豐富既材料，而且唔少係美容妙品：桃膠 (含豐富膠原蛋白)、原隻烏雞 (滋陰補虛)、杞子、南棗、紅棗、金華火腿、北茋、黨蔘等等，真材實料，味道濃郁，而且仲可以無限添湯 (出面唔少火鍋店都限定添湯次數，第二次以上就要加錢架啦)，一邊打邊爐一邊不停飲湯，唔駛慳住慳住，確係正！

有機秋葵 ($68)

日本金菇 ($48)

有機玉米 ($68)

千層凍豆腐 ($48)

鮮炸響鈴 ($68)

先黎一堆齋菜，材料好新鮮，尤其喜歡秋葵，出面打邊爐較少見；另外不得不提響鈴，全部自己鮮炸，上枱時仲熱辣辣、脆卜卜，忍唔住齋啪左少少！

梅菜豬肉丸 ($36/ 半份)

因為有朋友唔食牛肉，所以響芸芸手打丸之中，選擇左梅菜豬肉丸，咬落有粒粒爽口梅菜，好有口感。

極品西班牙黑毛豬梅肉 ($118)

美國安格斯肉眼肥牛 ($168)

肉類質素亦唔錯，肥牛脂肪分佈平均，非常嫰滑，稍為淥一淥就食得；黑毛豬就剛好相反，淥得耐都仍然保持少少爽，各有特色，兩種都好食！

中法Fusion完美混合

中法混血兒，唔駛講都係靚啦！但如果應用響食物上呢？中法Fusion又點睇？

Mass 2位於天后一幢舊式商廈裡面，走到入去，感覺唔錯：畫滿宇宙星空既牆壁、型格既吧枱、舒適既open area，啱晒上班族放工黎吹水輕鬆下！

打開餐牌，會發現好多幾特別既Fusion菜式，例如係綠茶炸魚薯條、慢煮豉油雞、賽螃蟹沙律等等，原來大廚來自中餐館世家，自小已受到家人薰陶，自己同時又到過法國學廚，所以黎到Mass 2，決定將自己兩項專長發揚光大，做成各式各樣大家諗都無諗過既Fusion菜，實行俾各位老饕全新既餐飲體驗。

想抵食一D，可以叫$198/五道菜，包晒頭盤、前菜、主菜、甜品、咖啡或茶。

上海賽螃蟹沙律配鎮江醋 ($98)

將傳統賽螃蟹加入黑魚子同蟹肉，再淋上黑醋，咁就成為一道充滿特色既Fusion菜。蟹肉鮮味，黑魚子脆卜卜，比起普通賽螃蟹更有口感。

低溫慢煮油封鴨配山楂意大利飯 (跟餐)

鴨皮煎得香，鴨肉嫰滑；意大利飯竟然帶有濃濃既酸味，一問之下，原來係加入左山楂，咁做既目的，正係要將山楂既酸味中和油鴨既膩，兩者同食就可以減低飽滯感。

自家製低溫慢煮牛叉燒配時令薯菜 ($188)

由細食到大，叉燒都一定係豬肉，呢度就一反傳統，用上牛肉。牛肉食起黎果然有叉燒既調味，最抵死係，伴碟既竟然係菜心花，底部既竟然係一粒粒米狀既意粉，食起黎，個感覺好似中式飯呀~~~~~！好彩牛肉既半生熟製法，會提番你呢碟係西餐黎架！

Toffee Apple Beer ($60)

提提大家，呢度仲有好多唔同既酒款可供選擇，要黎睇波、吹水、飲野都OK。我呢晚飲既係手工啤Toffee Apple，甜甜既味道好易入口，女仔飲最啱！

寶琳站平食魚生

家住觀塘，想行下商場，除左去apm之外，偶然都鍾意搭幾個站去將軍澳尋找「新鮮感」，講到搵食，我有時會幫襯「魚之神」，因為佢既「假日午市定食」幾抵食，價錢由$70起，配齊三文魚刺身 (三件)、前菜、湯及飲品，而且選擇夠多，壽司、天婦羅、鐵板、麵食、鍋物等等一應俱全，食凍食熱，悉隨尊便。

三文魚刺身 (跟餐免費)

色澤鮮明，脂肪比例唔錯，肥美有油香。

極上壽司盛 ($88)

包括：吞拿魚、油甘魚、劍魚腩、池魚、鯛魚、三文魚腩、希靈魚、甜蝦、加州反卷。其中三文魚腩尤其出色，夠肥美，入口即溶；希靈魚味道濃厚，質地結實，魚子卜卜脆，令人印象難忘！

鵝肝壽司 ($36)、珍寶帆立貝壽司 ($32)、和牛壽司 ($28)、

腐皮壽司 ($10)、加拿大海膽壽司 ($32)、山葵八爪魚軍艦

我今日個胃麻麻地，想食少D，於是散叫左唔同既壽司。特別喜歡個海膽壽司，雖然唔算好大片，但夠鮮甜，估唔到平平地都有咁既貨色；另外八爪魚軍艦都幾特別，師傅加入左經醃製既西芹，好爽口，咬到sok sok聲；帆立貝好厚肉，一啖咬落去，啖啖鮮味，唔錯。

超抵食午市日式烤肉套餐

有無諗過，去iSquare食餐飯只係需要$65？而且仲要係日式燒肉！

位於iSquare七樓既「燒肉牛藏」隸屬鴻星集團，出品有保障，估唔到既係，呢度既日式烤肉定食只係由$65起 (周末都有)，仲包埋前菜、飯同汽水，你都咪話唔抵！

餐廳裝修充滿日式風情，而且座位頗多，一大班朋友黎聚會都坐得舒服。

調味料方面，有胡椒粉、新鮮青檸同燒汁，另外仲有岩鹽，食靚燒肉，簡簡單單既調味已經足夠。

$65既選擇都有頗多，例如係醬汁豬肉、醬汁豬頸肉、醬汁雞肉、櫻花豚腩片等等，$68就有三式烤肉 (牛、豬、雞) ，而我地今日食「豪」少少，叫左「一口牛」同「牛肋骨」。

極上一口牛 ($89)

燒既時候有技巧：見到每邊煎熟先好反，唔好不斷反黎反去，用個箝feel下，如肉粒中間有實實地既感覺，就已經夠熟，如果仲係腍既，就要烤多一陣啦。

經過高人指點，我地都燒得唔錯，牛肉油脂分佈平均，牛肉味濃，中間仍然保持juicy，好味道。

醬汁牛肋骨 ($118)

呢個較有韓式風情，牛肋骨醃得入味，由於比較薄身，一煎即熟，腍腍既肉質，送飯很好。

芝麻雪糕、豆腐雪糕 (各$22)

慳左既錢，不如叫個甜品。剛剛食完咁多熱辣辣既烤肉，而家食個雪糕最啱數！呢度提供既都係日本雪糕，香濃既芝麻同豆腐味，相當出色！