2016年10月15日 星期六

$700+既Omakase有咩食?

如果你都係日食控,無理由唔去試下Omakase既,因為往往充滿驚喜!呢晚我去左銅鑼灣時代廣場旁邊既百樂中心,入面有一間可以食Omakase既「花見日本料理」,每人預算$700-$800左右,究竟有咩食呢?




餐廳以木製家具為主,簡單但充滿日本風情。



日本桃太郎番茄

先黎前菜 -- 番茄沙律。經店長介紹,此乃日本桃太郎番茄,皮薄、多汁,加上日式芝麻醬同洋蔥絲,清新之選。




八爪魚刺身

同一條八爪魚鬚竟然有兩食!八爪魚觸鬚做左刺身,爽口鮮甜;吸盤部分略燒過,帶出八爪魚既獨有香氣,質感爽脆唔靭,impressive!




池魚刺身

秋天食刺身特別肥美,呢碟池魚都唔例外,薄身有油香,唔錯。





刺身、壽司、蝦頭湯

接住係唔同既刺身同壽司,當中最美味既係牡丹蝦,大隻、爽口又鮮甜,新鮮貨色,必食!食完之後,可以選擇將蝦頭油炸或做湯,因為怕熱氣,所以揀左做麵豉湯,湯內有麵包圈、蒟蒻、海帶等等,別有一番風味。



燒白飯魚乾

估唔到咁甘香,食完有少少回甘,點埋沙律醬食,香脆好味,喜歡嗒兩杯既,用黎送酒更一流!




磯燒北海道帶子

師傅用秘製醬汁將帶子燒過,帶子厚身、鮮甜,用紫菜包住食,又脆又好味!




黑豚肉露筍串、辣椒串

黑豚肉略帶脂肪,口感豐盈,BB露筍細嫰,啱我;辣椒仔有辣有唔辣,每條各有個性,食落你就知!


汁煮油甘魚頭

魚頭斬件後用日式甜豉油煮過,即刻想扒碗白飯!店長非常細心,我都未開口,佢已經主動問我地要唔要飯,要呀要呀!魚頭好多肉,又有甜甜既蘿蔔、本菇等配菜,真係好好送飯!




海膽天婦羅

海膽用昆布包住再炸,昆布味道唔濃,唔會搶走海膽既鮮味;天婦羅因為係即炸,好脆口,漿粉好薄唔覺油膩,好食。



芒果橘子燒酌寒天

最後一道甜品依然叫我驚喜!芒果又大又厚又甜,肉質實淨,加上獨特既香氣,非常美味!底下係燒酌寒天,酒味香濃,再加塊橙仔響中間,夠晒fresh!











沒有留言:

張貼留言

注意:只有此網誌的成員可以留言。