2016年10月6日 星期四

中西合璧私房菜,好食!

響尖沙咀區返工,成日會search下附近有咩好野食。近日見到有間新開既私房菜叫「新橋世民」,於是放工就約齊飯腳,一齊黎試下。


講真,黎到覺得呢度既裝修都幾奇怪,好似時光倒流20年咁,電視播緊重播到爛既80年代翻炒電影,牆上既壁畫又好「懷舊」,經理解釋,壁畫主題來自法國既新橋 (Pont Neuf,餐廳亦因此命名),佢地稍後會再裝修,到時將會耳目一新咁話。

Any肥,裝修唔係重點,食物先係。呢度提供既私房菜中西合璧,而且中西菜都做得好,食材又夠特別,都幾值得推薦,以下逐一介紹。



柚子汁吞拿魚

面頭黃色既係炸過既薑絲,脆卜卜,薑味濃;下面係外層輕烤過既吞拿魚,有香噴噴既炭燒味,有少少豬肉乾既口感,外脆內軟,配埋酸酸甜甜既柚子汁食,好味;吞拿魚之下仲有兩條秋葵,整道菜既感覺清新味美。



青欖雪梨湯

從來無飲過青欖湯,響網上翻查資料,原來青欖具有清熱、利咽、生津、解毒既功效,配埋清潤既雪梨,啱晒我地呢D熱氣精,秋天飲亦非常啱數。個湯煲得入味,帶有微酸,我嗒過粒欖,有輕微既酸同澀味,感覺好特別。




牛油高湯虎蝦

好好食!虎蝦大隻、厚肉、鮮甜,可以用刀叉黎享受。牛油高湯味道幾濃,似係牛油汁多D,鹹鹹地,用黎點蝦或伴碟既烤牛油麵包條都very good!


黑松露炒帶子

第一次食新鮮刨出黎既黑松露,原本以為味道會好濃烈,但真係估唔到,原來係幾清新。帶子好厚肉+鮮甜,翠玉瓜同甜椒亦甜美,好好送飯既一道菜。


芥蘭度炒鴿肉

所謂「芥蘭度」,其實係將芥蘭切段,較老身既外皮亦去掉,只剩下軟嫰既部分,唔駛講梗係好味;令我更surprise既係鴿肉,因為出面食到既乳鴿一般都係比較嚡口,但呢度竟然係滑既,我食到鴿既味道,但食唔到平時乳鴿既質感,問下經理,原來佢地係使用真‧BB鴿,所以鴿肉較嫰身,OIC。



金榜醬稻亭麵

第一次食金榜醬,味道好似喇沙,非常香濃;稻亭麵超滑,「雪雪」聲就吞晒落肚。呢碗麵材料雖然簡單,但就成為我今晚印象最深刻既一道菜,好想再返黎食多次!



法式燉蛋

由於餐廳仲係新張期,所以like佢地面書會送甜品,咁我地呢d cheap友梗係唔蝕底。本身餐廳係送奶凍既,但我唔食奶味產品,餐廳就好細心咁幫我換左法式燉蛋,服務值得一讚!燉蛋好滑夠creamy,面層焦糖即場燒出黎,夠香脆。

成餐飯六道菜,每人大約$380 (連加一),味道真係唔錯,會再黎幫襯。





沒有留言:

張貼留言

注意:只有此網誌的成員可以留言。